ԱՄՆ իրավապահ մարմինների կողմից հետախուզվող եւ 2016 թ. օգոստոսի 26-ին ՀՀ-ում ձերբակալված ՌԴ քաղաքացի Սերգեյ Միրոնովի գործով Հայաստանի գլխավոր դատախազությունը ՀՀ վերաքննիչ դատարան բողոք է ներկայացրել:
Դատախազությունը միջնորդել է Սերգեյ Միրոնովին 40 օր ժամկետով կալանավորելու վերաբերյալ առաջին ատյանի դատարանի միջնորդությունը մերժելու մասին որոշումը բեկանել:
Այսօր այս մասին «Պոստ սկրիպտում» ակումբում ասաց Միրոնովի պաշտպան՝ փաստաբան Վրեժ Խաչիկյանը:
Ըստ նրա, դեռ տեղեկություններ չկան դատական նիստի տեղի և ժամի վերաբերյալ: Փաստաբանի խոսքով, ՀՀ գլխավոր դատախազությունը դատարան էր ներկայացրել նաեւ գործի վերաբերյալ ԱՄՆ-ի ուղարկած բոլոր անհրաժեշտ փաստաթղթերը, իսկ դրանց թվում եղել է գրություն, որը փաստում էր, որ անձը հետախուզվում է «Ինտերպոլի» կողմից, բայց ըստ փաստաբանի՝ բացակայում էին կարեւոր փաստաթղթեր.
«Պետք է լիներ իրավասու մարմնի կողմից կալանավորելու միջնորդությունը, ինչը չկար: Հետևաբար, այս պարագայում գերակայեց օրենքը»։
Կարդացեք նաև
Պարոն Խաչիկյանի խոսքով, Միրոնովի ռուսաստանցի փաստաբանները դիմում են ներկայացրել ՌԴ գլխավոր դատախազություն և «Ինտերպոլին»՝ ճշտելու, թե ինչու ՌԴ «Ինտերպոլը» տեղեկացված չէր և չէր ստացել անձին հետախուզելու վերաբերյալ «կարմիր քարտը»:
Հիշեցնենք, որ Սերգեյ Միրոնովը Երեւանում ձերբակալվելուց 2-3 ամիս առաջ ՌԴ-ից Հնդկաստան էր մեկնել:
Արփինե ՍԻՄՈՆՅԱՆ
