Չինաստանի Սինզյան-Ույգուրյան ինքնավար մարզի կենտրոն Ուրումչի քաղաքում այսօր իր աշխատանքները սկսեց Չինաստան-Եվրասիա տնտեսական զարգացում եւ համագործակցություն» համաժողովը, որի շրջանակներում կազմակերպվել է «Չինաստան-Եվրասիա» 5-րդ էքսպո-ցուցահանդեսը: Այստեղ տաղավարներ ունեին շատ ավելի մեծ տարածաշրջանի երկրներ, քան ենթադրվում էր ցուցահանդեսի անվանումից՝ ասենք, Բրազիլիան, աֆրիկյան պետություններ եւ այլն: Տաղավարներ ունեին նաեւ մեր հարեւանները՝ Վրաստանն, Իրանն ու Ադրբեջանը. վրացիները ներկայացրել էին իրենց «Սապերավի» գինիները: Ցավոք, չհանդիպեցինք հայկական տաղավարի:
Համաժողովի բացման արարողության ընթացքում Չինաստանի առեւտրի փոխնախարար Վանգ Շոուվենը հիշատակեց մեր երկիրը՝ «Հյուսիս Հարավ» ավտոճանապարհի կառուցման առնչությամբ: Խոսեց նաեւ Վրաստանի հետ ազատ առեւտրի շուրջ վարվող բանակցությունների մասին:
Այս համաժողովի ելույթների գլխավոր թեման Չինաստանն ու Ասիայի եւ Եվրոպայի երկրները միջնադարում միացնող Մետաքսի քարավանային ճանապարհին կից պետությունների հետ համագործակցությունն էր՝ շուրջ 30 երկրների հետ այժմ վարվում են բանակցություններ այդ ճանապարհի տնտեսական գոտին վերականգնելու համար, եւ չինացի պաշտոնյաները պատրաստակամություն էին հայտնում աջակցություն ցուցաբերել այն երկրներին, որոնք կընդգրկվեն տվյալ նախագծում:
Տաջիկստանի վարչապետ Կոհիր Ռասուլզոդան իր ելույթում Մետաքսի ճանապարհի տնտեսական գոտու չինական ներդրումներով վերականգնման համար որակումներ չէր խնայում՝ «մեգանախագիծ», որը քամի կդառնա իրենց առագաստների համար, կոռոգի ցամաքած հունը եւ այլն:
Կարդացեք նաև
Պակիստանի Ազգային ժողովի նախագահ Սարդար Այազ Սադիքը ոգեւորությամբ խոսում էր այն մասին, թե ինչ տնտեսական հնարավորություններ ու աշխատատեղեր կբացվեն այս «մետաքսե» ծրագրի շնորհիվ:
Համաժողովի բացմանը ելույթով հանդես եկավ նաեւ Հայաստանի ԱԺ փոխնախագահ Հերմինե Նաղդալյանը, որը Մետաքսի ճանապարհը գնահատեց իբրեւ տարբեր ազգերի «ընդհանուր հարստություն», այն վերականգնելու՝ Չինաստանի նախագահի նախաձեռնությունն էլ անվանեց երկուստեք փոխշահավետ համագործակցություն:
«Դեռ Մետաքսե մեծ ճանապարհի ժամանակներում հայկական ապրանքները հայտնի էին չինական շուկայում, իսկ հայկական առեւտրային նավերը հասնում էին մինչեւ Ասիայի արեւմտյան ափերը,- ելույթում ասաց Հերմինե Նաղդալյանը,- Ես խորապես վստահ եմ, որ Մետաքսի ճանապարհի երկրների միջեւ բարեկամական ու ակտիվ համագործակցությունը կարեւոր նշանակություն ունի տնտեսական գոտու կայացման համար»:
Հայաստանի ԱԺ փոխնախագահը նաեւ նշեց, որ թեեւ մեր երկիրը ելք չունի դեպի ծով, սակայն ունի աշխարհագրական շահավետ դիրք. «Այժմ Հայաստանում իրականացվում են մի շարք կարեւոր ենթակառուցվածքային ծրագրեր, որոնց արդյունքը պետք է դառնա Հայաստանով տրանզիտային փոխադրումների ավելացումը: Հայաստանն ունի ոչ միայն տրանզիտային երկրի առավելություն, այլ նաեւ նշանակալի ներուժ երկկողմանի տնտեսական համագործակցության համար»:
Ի դեպ, 2015 թվականից արդեն գործում է «Մետաքսի ճանապարհի» հիմնադրամը, որն արդեն իսկ գործընկերային կապեր է հաստատում հնարավոր գործընկերների հետ: Հիմնադրամի ներկայացուցիչը «Առավոտի» թղթակցի հետ զրույցում հաստատեց, թե Հայաստանն այդ երկրների շարքում է:
