Հոկտեմբերի 28-ին Կոմիտասի անվան կամերային երաժշտության տանը Խաչատրյանի փառատոնի շրջանակներում տեղի է ունեցել Հայաստանի պետական երիտասարդական նվագախմբի պղնձափողային կազմի և պղնձափողային կվինտետի համերգը։ Պղնձափողային կվինտետի կազմում հանդես են գալիս Տիգրան Ավագյանը (շեփոր), Լևոն Պուչինյանը (շեփոր), Վահրամ Դավթյանը (տրոմբոն), Արմեն Կարագյանը (գալարափող) և Հարություն Հաջինյանը (տուբա)։
Համերգային ծրագրի առաջին բաժնում հանդես է եկել նվագախմբի պղնձափողային կազմը: Ներկայացված ստեղծագործությունները փոխադրվել են Կոնցերտգեբաու նվագախմբի պատվերով, ապա հրատարակվել եվրոպական հրատարակիչների կողմից: Ներկայացված ստեղծագործություններն այս կազմով Հայաստանում հնչել են առաջին անգամ: Համերգային ծրագրի երկրորդ բաժնում նորաստեղծ փողային կվինտետի կատարմամբ հնչել են արևմտաեվրոպական և ամերիկյան կոմպոզիտորների բազմաժանր ստեղծագործություններ, որոնց մեծ մասը նույնպես Հայաստանում կատարվել է առաջին անգամ:
Տրոմբոնահար Վահրամ Դավթյանը նշում է, որ պղնձափողային կվինտետով հանդես գալու մտադրություն վաղուց կար, սակայն ծանրաբեռնված գրաֆիկի, տարբեր նախագծերում ընդգրկված լինելու պատճառով ելույթը հետաձգվում էր։ «Այս համերգով տրվեց մեկնարկը, և հույս ունենք, որ ապագայում ավելի հաճախ հանդես կգանք»,- ասում է Վահրամ Դավթյանը։
Խաչատրյանի 4-րդ միջազգային փառատոնն անցկացվում է ՀՀ Նախագահ Սերժ Սարգսյանի հովանու ներքո։ Փառատոնը կազմակերպել են Հայաստանի պետական երիտասարդական նվագախումբը (գլխավոր գործընկեր՝ ՎիվաՍելլ-ՄՏՍ) և «Դասական երաժշտության աջակցություն» ՀԿ-ն՝ ՀՀ մշակույթի նախարարության, «Խաչատրյան» և Մշակույթի աջակցության եվրոպական հիմնադրամների աջակցությամբ։
Կարդացեք նաև
Խաչատրյանի 4-րդ միջազգային փառատոն
