Քիչ առաջ ԵՊՀ գլխավոր մասնաշենքի մոտից Լեոնիդ Ազգալդյանի անվան մարտական պատրաստության ակումբի երիտասարդ անդամները սկսեցին ապրիլյան պատերազմի զոհերի հիշատակին նվիրված երթ դեպի «Եռաբլուր» զինվորական պանթեոն: Նրանց երթն ընթանում է հայրենասիրական երգերով ու դրոշներով:
Ակումբի ղեկավար Մհեր Օթարյանի խոսքով, մեկ տարի առաջ հենց այսօրվանից ԵՊՀ-ում սկսվել էր ուսանողների կամավորագրումը. «Անցել է մեկ տարի, մենք այս երթով ցանկանում ենք ասել, որ չենք մոռացել ապրիլյան հերոսներին, մենք չենք մոռանում ոչինչ ու ոչ մեկի»:
Նրա խոսքով, ԵՊՀ-ից կամավորագրվեց քսանհինգ ուսանող ու մեկնեց ռազմաճակատ, նրանց մեջ էր նաեւ ինքը: Մեր հարցին՝ ինչ զգացողություններով գնացիք ու ինչ զգացողություններով վերադարձաք, նա դժվարացավ պատասխանել. «Չեմ կարողանում բառերով բացատրել, ուղղակի ինքնաբուխ, սրտաբուխ, ցանկություն եղավ, գնացինք»:
Ռազմաճակատ գնալիս իրեն միակ հուզող հանգամանքը ծնողներն էին, ընտանիքը. «Մամաս նեղացել էր, հետս մի շաբաթ չէր խոսում, ասում էր՝եթե գնաս, չեմ խոսելու հետդ, դա էր ինձ միակ անհանգստացնող բանը, ամեն անգամ, երբ ծնողներիցս մեկի հետ խոսում էի, ինձ համար շատ ծանր էր»:
Մհեր Օթարյանի խոսքով, իր հետ մեկնած բոլոր համալսարանականները ողջ ու առողջ՝ առանց կորուստների, վերադարձան. «Մենք չհասցրինք մասնակցել մարտական գործողություններին, մենք եղել ենք պահեստազորայինի կարգավիճակում, բայց ցանկությունը մեծ էր մասնակցել մարտական գործողություններին»:
Արփինե ՍԻՄՈՆՅԱՆ