Ճարտարապետության և շինարարության Հայաստանի ազգային համալսարանը (ՃՇՀԱՀ) բարձր է գնահատում իր այն ուսանողներին, ովքեր իրենց պարտքն են կատարում Հայաստանի և ԼՂՀ-ի զինված ուժերում և վառ են պահում զոհվածների հիշատակը:
ՃՇՀԱՀ-ն և «Բարեպաշտ սերունդ» հիմնադրամը հավերժացրեց Ապրիլյան քառօրյաում զոհված հերոս, իր «հավերժ» ուսանող Ադամ Սահակյանի անունը՝ սահմանելով Ադամ Սահակյանի անվան կրթաթոշակ:
«Համալսարանի ռեկտոր Գագիկ Գալստյանի այս նախաձեռնությանը մենք սիրով միացանք և կարճ ժամանակահատվածում ձեռք բերեցինք պայմանավորվածություն: Ապրիլյան քառօրյա պատերազմը ապացուցեց, որ հայրենիքը պաշտպանելու հայ ժողովրդի կամքը անկոտրուն է: Եվ մեր տղաների և նրանց հրամանատարների անկոտրուն կամքի շնորհիվ մենք հաղթեցինք: Խոնարհվում ենք նրանց հիշատակի առջև, ով չվերադարձավ և մեր շնորհակալությունը նրանց, ովքեր ծառայել և ծառայում են հանուն հայրենիքի:»,- իր ելույթում ասաց «Բարեպաշտ սերունդ» հիմնադրամի տնօրեն Վահրամ Մկրտչյանը:
Ըստ հաստատված կարգի Ադամ Սահակյանի անվան կրթաթոշակը տրամադրվում է այն ուսանողներին, ովքեր ծառայել և առանձնացել են բանակում կամ մասնակցել են 2016-ի Ապրիլյան քառօրյա պատերազմին: Հերոսի անվան կրթաթոշակը նախատեսված է ոչ միայն կրթության մեջ առաջադիմողներին, ինչը առանձնակի է դարձնում կրթաթոշակը:
Կայացած մրցույթային հանձնաժողովում որոշվեց կրթաթոշակը հատկացնել առաջինից երկրորդ կուրսերում սովորող, պարտադիր զին ծառայությունը անցած ուսանողների շրջանակներում: Կրթաթոշակը սահմանված է երեք անվանակարգերով:
Առաջին անվանակարգում հաղթող ճանաչվեց շինարարության ֆակուլտետի երրորդ կուրսի ուսանող Տարոն Հայրապետյանը, ով 2014–2016թթ-ին ծառայել է զինված ուժերում, մասնակցել է Ապրիլյան մարտական գործողություններին: Ծառայության ընթացքում ՀՀ ՊՆ նախարարի հրամանով պարգևատրվել է «Գարեգին Նժդեհ» մեդալով, «Քաջարի մարտիկ» կրծքանշանով և մարտական հերթապահությունների ժամանակ ցուցաբերած արիության և անկոտրուն կամքի համար արժանացել է 6 պատվոգրերի:
Երկրորդ անվանակարգում հաղթող ճանաչվեց քաղաքային տնտեսության և էկոլոգիայի ֆակուլտետի առաջին կուրսի ուսանող, սերժանտ Հայկ Գևորգյանը, ով 2014-2016թթ–ին ծառայել է զինված ուժերում, մասնակցել Ապրիլյան մարտական գործողություններին: ԼՂՀ նախագահի հրամանով պարգևատրվել է «Մարտական ծառայություն» մեդալով, «Զորամասի ավարտական» կրծքանշանով, զորամասի հրամանատարի շնորհակալագրերով:
Երրորդ անվանակարգով հաղթեց ճարտարապետական ֆակուլտետի երրորդ կուրսի ուսանող, ավագ սերժանտ, նախկին ջոկի հրամանատար Վահան Հարությունյանը, ով ծառայել է զինված ուժերում, մասնակցել Ապրիլյան մարտական գործողություններին: Պարգևատրվել է «Քաջարի մարտիկ», «Բանակի գերազանցիկ» կրծքանշաններով:
Պարգևները գտան իրենց արժանիներին: Իհարկե այս պահին հպարտություն եմ ապրում, սակայն այն խառնված է և կարոտով և թախիծով: Հիշում եմ տղաիս և նա կրկին վերակենդանանում է այս պահին ինձ համար»- նշեց Գայանե Սահակյանը՝ Ադամ Սահակյանի մայրը:
ՃՇՀԱՀ-ի մամուլի քարտուղար Ժասմին Վիյան
10.05.2017
