Ինչպես տեղեկացրել ենք, քիչ առաջ նախագահականում ՀՅԴ -ն եւ ՀՀԿ-ն նոր կոալիցիոն համագործակցության հուշագիր ստորագրեցին:
Թե ինչ տարբերություն կա այս կոալիցիոն փաստաթղթի եւ նախկին հուշագրի միջեւ, որը կնքվել էր ՀՀԿ-ի եւ ՀՅԴ-ի միջեւ, ՀՀԿ փոխնախագահ Արմեն Աշոտյանն ասաց, որ եթե քաղաքական փուլերը համեմատենք նախորդ փաստաթղթի հետ, սկզբունքային, էական տարբերություններ կան: Նախկինում համագործակցության հեռանկարը կախված էր նրանից, թե ինչպիսին կլինեին ԱԺ ընտրությունների արդյունքները եւ երկու կուսակցությունները որքան ձայն կստանային. «Նոր փաստաթուղթը գործունեության ժամկետ է ամրագրում, խորհրդարանական հանրապետությանը բնորոշ նոր համագործակցության տարրեր է ամրագրում»:
Թե ինչ ձեռքբերումներ եւ բացթողումներ են ունեցել նախորդ համագործակցությունից՝ Արմեն Աշոտյանն ասաց, որ իրենց հետ համագործակցության արդյունք է, օրինակ, Ընտրական օրենսգիրքը, նոր կառավարության կողմից որդեգրած քաղաքականությունը՝ կառավարման արդյունավետության բարձրացման ուղղությամբ:
Ինչ վերաբերում է բացթողումներին՝ որեւէ բացասական կողմ իրենց համագործակցության հարցում Աղվան Վարդանյանն ու Արմեն Աշոտյանը չնշեցին:
Ինչ վերաբերում է ՀՅԴ-ի պորտֆելներին, հարցին՝ դրանք պահպանվելո՞ւ են՝ կոալիցիոն գործընկերներն ասացին, որ «խորհրդակցությունների միջոցով պաշտոնների համար թեկնածություններ են առաջադրվելու ընդհանուր պատասխանատվության ներքո»:
ՀՅԴ ԳՄ ներկայացուցիչ Աղվան Վարդանյանն ասաց, որ հուշագրում պաշտոնի մասին որեւէ խոսք չկա: Միայն վարչապետի առաջադրումը վերապահված է ՀՀԿ-ին:
Ուշագրավ է, որ կուսակցությունները պարտավորվել են սահմանադրական նշանակություն ունեցող որոշումների հարցում կոնսենսուսի գալ եւ տարաձայնություններ չունենալ, այսինքն, ՀՅԴ-ն պետք է սատարի իշխանությանը կարեւոր որոշումների անցկացման հարցում:
Հռիփսիմե ՋԵԲԵՋՅԱՆ
