Մարտիրոս Սարյանի տուն-թանգարանում այսօր լրագրող Մարկ Գրիգորյանի հեղինակային հեռուստահաղորդաշարի՝ «Անծանոթ Երևան»-ի ամփոփիչ միջոցառումն էր: «Անծանոթ Երևան»-ը մայրաքաղաքի հին շենքերի, դրանց ճարտարապետ-հեղինակների, ինչպես նաև բնակիչների պատմությանը նվիրված հաղորդաշար է, որում հեղինակ Մարկ Գրիգորյանը փորձել է ամփոփել տվյալ ժամանակաշրջանի կարևոր իրադարձություններ, ներկայացնել հին երեւանցիների հիշողություններն ու պատմությունները:
«Ավելի քան երկու տարում ունեցանք 70 թողարկում: Ժամանակն էր հաղորդումը փակել: Այնքան նյութ է հավաքվել, որի հիման վրա կարող եմ գրել 20-րդ դարի Երեւանի պատմությունը, գուցե մի քանի գիրք գրեմ»,-լրագրողների հետ զրույցում ասաց Մարկ Գրիգորյանը: Հիշեցնենք, որ ըստ մամուլի տեղեկությունների՝ նա Հայաստանի հանրային ռադիոյի տնօրենի պաշտոնի ամենահավանական թեկնածուն է:
Հին Երեւանի մասին հուշերը ներկայացնելու էր եկել նաեւ քանդակագործ Լեւոն Թոքմաջյանը, որը շատ է գնահատում Մարկ Գրիգորյանի հաղորդումը: «Այս էլիտար՝ անհայրենիք շենքերն ինձ չեն ուրախացնում: Երեւանի ամեն հին շենքը, որի մեջ հոգի, կյանք եւ հայի բնավորություն կա, տասը էլիտար շենքի հետ չեմ փոխի»,-լրագրողներին ասաց նա:
Միջոցառումն իր ներկայությամբ պատվել էր նաեւ կոմպոզիտոր Տիգրան Մանսուրյանը: Հետաքրքրվեցինք, թե ինչպիսին նա կուզեր տեսնել այսօրվա Երեւանը: «Այն թթենիներով, որոնք բակերում կային: Տանտերերը երբեմն անցորդներին ասում էին՝ «համեցեք թո՜ւթ ուտելու»…այդ բառերն այլեւս չեն լսվում այս քաղաքում, բայց կարոտում եմ այդ խոսքերը»,-անկեղծացավ մաեստրոն:
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
