«Ֆինանսական աջակցությունը հանձնաժողովը կտա այն կազմակերպությանը, որը նրան ծափ կտա, ոչ թե օրինակ՝ Էլեկտրիկ Երեւանին»,- ԱԺ տնտեսական հարցերի մշտական հանձնաժողովի այսօրվա նիստում իր վրդովմունքը հայտնեց «Ծառուկյան» խմբակցության պատգամավոր Սերգեյ Բագրատյանը: Նրա վրդովմունքն ուղղված էր Արդարադատության փոխնախարար Արթուր Հովհաննիսյանին: Վերջինս ներկայացրել էր «Հանրային ծառայությունները կարգավորող մարմնի մասին» ՀՀ օրենքում փոփոխություններ եւ լրացումներ կատարելու մասին հարցը: Ըստ այդմ, հանձնաժողովը պիտի որոշակի չափով ու որոշակի պարբերականությամբ ֆինանսավորի սպառողների շահերի գործունեություն իրականացնող հասարակական կազմակերպություններին:
Նաեւ առաջարկվում է, որ 2018-ի ապրիլից հետո, երբ նախագահը վայր կդնի լիազորությունները, մեկ տարվա ընթացքում ԱԺ-ն կատարի հանձնաժողովի նախագահի, տեղակալի ու 3 անդամների նշանակումներ. հանձնաժողովի նախագահին 5 տարի ժամկետով, տեղակալին՝ 4 տարով, անդամներին՝ 3, 2 եւ 1-ական տարով:
Սերգեյ Բագրատյանին զարմացնում է ֆինանսական աջակցություն ցուցաբերելու առաջարկը կազմակերպություններին, որոնք մեծ մասամբ քննադատում են հանձնաժողովի գործունեությունը: Արթուր Հովհաննիսյանը պարզաբանեց` հանձնաժողովն է որոշելու` ի՞նչ չափորոշիչների են բավարարելու այդ կազմակերպությունները: Նա վստահեցրեց`մոտեցումը կողմնակալ չի լինելու:
Հանձնաժողովի ՀՀԿ-ական նախագահ Խոսրով Հարությունյանը հիշեցրեց հայտնի խոսքը՝ բոլորս հավասար ենք, բայց կան ավելի հավասարները:
Պատգամավորները խոստացան առաջարկներ ներկայացնել, փոխնախարարն էլ խոստացավ լրամշակված տարբերակը ներկայացնել վաղվա արտահերթ նիստին:
Հարցն ընդունվեց միաձայն:
Նելլի ԳՐԻԳՈՐՅԱՆ