«Հայրենիքը սկսվում է Թալիշից…»: Թալիշեցիների դպրոց մտնելիս պատին փակցված այս գրությունն է առաջինը ուշադրություն գրավում: Միայն թե դպրոցը հայրենի Թալիշում չէ, այլ Ալաշան առողջարանային համալիրում, որտեղ Ադրբեջանի ապրիլյան հրետակոծությունից հետո հաստատվել է թալիշեցիների մի մասը, ապա՝ շենքերից մեկը կրթօջախ դարձրել…
Սահակյան Հերմինեն հայոց լեզվի եւ գրականության ուսուցչուհին է: Aravot.am-ի հետ զրույցում ասում է՝ հիմա տարբերությունն այն է, որ Ալաշանում իր աշակերտների թիվը շատ քիչ է: Ապա հիշում է ապրիլյան ռազմական գործողությունները. «Լուսաբացին կրակոցներն ավելի ահարկու դարձան, ստիպված եղբորս մեքենայով՝ երեք անչափահաս երեխաներիս հետ, գյուղը լքեցինք…»:
Ուսուցչուհին ընդգծում է՝ հակամարտության գոտում ապրող աշակերտների հոգեբանությունն այլ է, նրանք էլ են զգում ու ապրում պատերազմի սարսափը. «Ապրիլյան պատերազմը խաթարեց նրանց մանկությունը: Նրանք երազում են, որ իրենց մանկությունն էլ գեղեցիկ լինի»:
Թալիշի միջնակարգ դպրոցի տնօրեն Տանյա Մեժունցն էլ իր հերթին ասում է՝ աշակերտներն ուզում են Թալիշ վերադառնալ. «Տղաներին, որ հարցնես՝ ուզում են զինվոր դառնալ»:
Ապա Ընկեր Սահակյանն է անկեղծանում՝ կշարունակի դասավանդել այստեղ՝ հույսով, որ ապագայում ամեն ինչ լավ է լինելու:
Այժմ դպրոցը 25 աշակերտ ունի՝ նախկին մոտ 100-ի փոխարեն:
Մանրամասն ՝ տեսանյութում
Լուիզա ՍՈՒՔԻԱՍՅԱՆ
