Հուլիսի վեցի բրիֆինգի ժամանակ ՄԱԿ-ի գլխավոր քարտուղարի խոսնակ Ստեֆան Դյուժարիկն անդրադարձել է Լեռնային Ղարաբաղի հակամարտության գոտում վերջին իրադարձություններին։ Նա, մասնավորապես, ասել է հետևյալը.
• Ինչպես 2017 թ. հունիսի 22-ին ընդգծել է ՄԱԿ-ի գլխավոր քարտուղարը, մեր մտահոգությունն աճում է՝ կապված անվտանգության իրավիճակի վատթարացման հետ, ներառյալ Լեռնային Ղարաբաղի հակամարտության շփման գոտում հրադադարի խախտման ամենավերջին դեպքերը։
• Մենք ի գիտություն ենք ընդունել և երկրորդում ենք համանախագահների վերջին հայտարարությունը՝ կապված Ֆիզուլիի շրջանի Ալխանլի գյուղի մոտ բռնության նոր դեպքերի հետ, որոնք հանգեցրել են զոհերի, այդ թվում՝ քաղաքացիական բնակչության շրջանում։
• Մենք կոչ ենք անում կողմերին ձեռնպահ մնալ ռազմական ցանկացած գործողությունից և խստորեն հորդորում ենք նրանց անհապաղ քայլեր ձեռնարկել իրավիճակի կայունացման ու հետագայում բռնության դեպքերի բացառման ուղղությամբ։ Բանակցությունների անհապաղ վերսկսումն այս երկարատև ու վտանգավոր հակամարտության լուծման միակ ուղին է։
Մամուլի հաղորդագրություն