Այսօր ժամը 8:00-ի սահմանում Վանաձոր-Դիլիջան ճանապարհին՝ Լերմոնտովո գյուղի տարածքում, կողաշրջվել է ՊՆ «ԿԱՄԱԶ» մակնիշի մեքենա: Բեռնատարը տեղափոխելիս է եղել ռազմական նշանակության տարբեր բեռներ: Վթարի հետեւանքով՝ վարորդը, որը պայմանագրային զինծառայող է, տեղափոխվել է Վանաձորի զինվորական հոսպիտալ:
ՀՀ պաշտպանության նախարարության մամուլի խոսնակ Արծրուն Հովհաննիսյանը Aravot.am-ի հետ զրույցում ասաց, որ զինծառայողի վիճակը գնահատվում է բավարար, ստացել է թեթեւ վնասվածքներ:
Իսկ թե ինչն է եղել վթարի պատճառը, պարզ չէ: Թեեւ դեպքի վայրում հավաքվածներն ասում են, որ պատճառը եղել է ճանապարհն անցնող նախիրը:
«Նախնական ոչ ոք չի կարող ասել, թե ինչն է եղել վթարի պատճառը: Հետաքննություն կլինի, կպարզենք»,-ասաց Արծրուն Հովհաննիսյանը:
Տաթեւիկ ՂԱԶԱՐՅԱՆ