Սեպտեմբերի 8-ին «Տեսակետ» մամուլի ակումբում հյուրընկալված հնագետ, Տիգրանակերտը պեղող արշավախմբի ղեկավար Համլետ Պետրոսյանը խոսեց Արցախում կատարված հնագիտական հետազոտություններից (Տիգրանակերտ, Վաճառի Ս. Ստեփանոս, Դադիվանք), դրանց վերջին արդյունքներից` կարասային թաղում, երկհարկանի դամբարան, խորհրդավոր գետնուղի և այլն:
Հնագետն ասաց` ուրախ է, որ Արցախում կատարված հնագիտական հետազոտությունները Արցախի իշխանությունների եւ հասարակության ուշադրության կենտրոնում են: Նրանք արդեն 10-րդ տարին են ֆինանսավորում Տիգրանակերտի պեղումները:
Ինչ վերաբերում է Հայաստանի իշխանություններին, Համլետ Պետրոսյանը հիշեցրեց, որ երբեւէ չեն աջակցել, իսկ Գիտության պետական կոմիտեն մերժել էր իրենց հայտը:
«ՀՀ վարչապետ Կարեն Կարապետյանը, որ մանկության տարիների իմ մտերիմներից է, վերջերս այցելել էր Տիգրանակերտ, բայց այդպես էլ հարկ չհամարեց հետաքրքրվել կամ հանդիպել արշավախմբի հետ: Քանի որ Արցախը միջազգայնորեն ճանաչված չէ, մեզ համար դժվար է դրամաշնորհներ ստանալը, սրան գումարած հայրենի իշխանությունները մեծամիտ կեցվածք են ցուցաբերում»,-ասաց Համլետ Պետրոսյանը:
Կարասային թաղումների մասին խոսելիս, նա փաստեց, որ դրանք հասնում են մինչեւ Քուռ գետ եւ մի ժամանակ տեսություն էր ստեղծվել`Կարասային թաղումների մշակույթ:
Նա անդրադարձավ Արցախում Արեւելյան մուտքով դամբարաններին ու զուգահեռ տարավ Զորաց քարերի աղմուկ հանած պատմության հետ: Հնագետի կարծիքով՝ պետք է ազգի բարոյական կերպարի մասին մտահոգությունները տարանջատել գիտական հետազոտությունից: Համլետ Պետրոսյանը նշեց, որ չի կիսում Պարիս Հերունու տեսակետը Քարահունջի վերաբերյալ:
Ինչ վերաբերում է Դադիվանքի պեղումներին, ասաց, որ այստեղ առաջին անգամ հանդիպում են քիմիա բառին որպես կանացի անձնանուն:
Մանրամասները տեսանյութերում`
Գոհար ՀԱԿՈԲՅԱՆ
