«Վարչապետ Կարեն Կարապետյանը մեկ տարվա պաշտոնավարման ընթացքում արդարացրել է Հանրապետական կուսակցության սպասելիքները»,- խորհրդարանում լրագրողների հետ զրույցում այսօր հայտարարեց ԱԺ փոխնախագահ էդուարդ Շարմազանովը:
Նա «ոտքի վրա» դժվարացավ գնահատական տալ կառավարության ու վարչապետի գործունեությանը, բայց արձանագրեց. «Լավ աշխատանքի դեպքում կարող ենք իրականացնել այն ծրագրերը, որ միասին ընդունել ենք»:
Դա նշանակո՞ւմ է, որ 2018-ից հետո նույնպես Կարեն Կարապետյանն է լինելու ՀՀԿ-ի վարչապետի թեկնածուն`հարցին, Էդուարդ Շարմազանովը պատասխանեց. «Այսօրվա եւ 2018-ի վարչապետների ֆունկցիաները շատ տարբեր են լինելու: Այսօրվա վարչապետը չունի 2018-ի վարչապետի լիազորությունները՝ արտաքին քաղաքականություն իրականացնելու եւ ղեկավարելու, գործադիրն ամբողջությամբ, ուժային կառույցները ղեկավարելու, անվտանգության որևէ գործառույթ: 2018-ի խորհրդարանական կառավարման համակարգի վարչապետն ունենալու է այլ լիազորություններ, որտեղ անկասկած տեղ են ունենալու ոչ միայն տնտեսությունը, այլ նախ եւ առաջ անվտանգությունը եւ արտաքին քաղաքականությունը»:
Նելլի ԳՐԻԳՈՐՅԱՆ
