Նոյեմբերյանի տարածաշրջանի հեռավոր, Ադրբեջանին սահմանակից Բարեկամավան գյուղի բնակիչները մեզ բողոքեցին, որ գյուղի արոտավայրերն այրվել են, խոշորեղջերավոր անասուններն արածելու տեղ չունեն, մտնում են գյուղացիների տնամերձ տարածքները, արածում, ոչնչացնում կանաչ մարգերը: Բարեկամավանցիների վկայությամբ՝գյուղի արոտավայրերը վառվել են Ադրբեջանի հետ սահմանում բռնկված հրդեհից, որը տարածվել է գյուղի տարածքում: Հրդեհի մյուս օջախն էլ գյուղացիների վառած կրակից է առաջացել:
484 բնակիչ ունեցող Բարեկամավանի հողատարածքների զգալի մասը ադրբեջանական գնդակոծության գոտում լինելու պատճառով չի մշակվում: Բարեկամավանի վարչական ղեկավար Ջոնիկ Միքայելյանն ասաց, որ բարեկամավանցիներն ունեն 290 գլուխ խոշորեղջերավոր անասուն: Դրա մեծ մասը պահվում է Բարեկամավանի սարերում, գյուղի անմիջական տարածքում առկա է շուրջ 100 խոշոր եղջերավոր անասուն: Բացի այդ, Բարեկամավանում պահվում է շուրջ 70 ոչխար: Ջ.Միքայելյանն ասաց, որ գյուղի արոտավայրերը հրդեհված են, սակայն անասունների արածելու համար տեղ կա: Նրա խոսքերով՝ խնդիրն այն է, որ արդեն 3 տարի բարեկամավանցիները կովերը նախիրով չեն արածեցնում: Անասունները թափառում են, կեր հայթայթում, մտնում գյուղացիների բանջարանոցները, ավերում դրանք:
Ջոնիկ Միքայելյանն ասաց, որ հիմնահարցն արդեն 3 տարվա պատմություն ունի, Բարեկամավանի նախկին գյուղապետ Գարիկ Աբազյանի պաշտոնավարման շրջանում թափառող, բանջարանոցներն ավերող կովերի խնդրով զբաղվել է ոստիկանության Նոյեմբերյանի բաժինը:
Ոսկան ՍԱՐԳՍՅԱՆ
