2018 թվականի պետական բյուջեի նախագիծը, որի քննարկումներն արդեն սկսվել են խորհրդարանում, «Ելք» խմբակցությունում համարում են աղքատության խորացման նախագիծ:
Խորհրդարանական ճեպազրույցների ժամանակ խմբակցության ղեկավար Նիկոլ Փաշինյանը նկատեց`արդեն երեք տարի մենք կենսաթոշակները, սոցիալական եւ ընտանեկան նպաստները չենք ավելացրել, բայց ունենք գնաճ: Միայն վերջին երկու տարիների տվյալներով գնաճը 6,7 տոկոս է: Սա փաստում է, որ սա ոչ թե աղքատության հաղթահարման, այլ խորացման քաղաքականություն է:
Հիշեցնում է`հունվարից ուժի մեջ են մտնելու Մաքսային միության հարկային նոր դրույքաչափերը, ինչը հանգեցնելու է առաջին անհրաժեշտության ապրանքների գնաճի` իր հետեւանքներով:
Խմբակցության քարտուղար Գեւորգ Գորգիսյանը հավելում է` 2017 թվականին առաջին անհրաժեշտության որոշ ապրանքներ արդեն կրկնակի են թանկացել: «Պետք է հաշվի առնել, որ շատ ավելի է լինելու քաղաքացիների գնողունակության անկումը, քան պարզապես թվերն են: Սրան գումարած կա նաև՝ 2018 թվականին գործելու է կուտակային կենսաթոշակային վարկը, հարկային օրենսգրքում փոփոխություններ, որոնցով տարբեր խավերից գանձվող գումարներն ավելանալու են, հարկային բեռն ավելանալու է տարբեր խավերի վրա»,- ասաց նա`հավելելով, որ հարկային բեռի եւ գնաճի նման պայմաններում մեզ «շատ լուրջ ճգնաժամային տարի է սպասվում»:
Մանրամասները` տեսանյութում
Նելլի ԳՐԻԳՈՐՅԱՆ
