Դեղատոմսերի ձեւերն ու դրանց դուրս գրման կարգը փոփոխվում է: Կառավարության վաղվա նիստի օրակարգում է ներառված նախագիծ, որով սահմանվում է ուժը կորցրած ճանաչել «Դեղատոմսերի ձեւերը, դեղատոմսեր գրելու, դեղեր բաց թողնելու (ներառյալ` էլեկտրոնային եղանակով) կարգը, ինչպես նաեւ դեղերի եւ դեղանյութերի հաշվառման կարգը սահմանելու եւ ՀՀ կառավարության 2001 թվականի օգոստոսի 14-ի թիվ 759 որոշումը:
Կառավարություն ներկայացրած նախագծում նշված է, որ նախագծի նպատակն է մեկ միասնական փաստաթղթով կարգավորել ՀՀ տարածքում դեղերի դեղատոմսերի շրջանառությունը, հստակ սահմանելով ՀՀ-ում թմրամիջոցների, հոգեմետ (հոգեներգործուն) նյութեր պարունակող դեղերի, անվճար եւ արտոնյալ կարգով հատկացվող դեղերի գրման, բացթողնման եւ հաշվառման կարգերը, դեղատոմսերի ձեւերը` համապատասխանեցնելով գործող օրենսդրությանը:
Ըստ առողջապահության նախարար Լեւոն Ալթունյանի, նշված գործառույթները գործող կարգերում կամ նկարագրված են թերի, կամ բացակայում են:
Ըստ նախարարի՝ գործող կարգով սահմանված կնիքների պահանջը նախագծով հանված է եւ սահմանվել է բժշկական հաստատության, անհատ ձեռնարկատիրոջ դրոշմակնիքի (առկայության դեպքում) եւ բժշկի անհատական կնիքի (առկայության դեպքում) պահանջ:
Կառավարություն ներկայացված նախագծի համաձայն սահմանվում է՝ դեղատոմսը պետք է մնա դեղատանը, հետագայում պատշաճ վերահսկողություն եւ մշտադիտարկում իրականացնելու նպատակով: Սահմանվում է նաեւ նոր դեղատոմսային 4 տեսակի ձեւաթղթեր` (նախկին կարգով սահմանված 3 ձեւի ձևաթղթերի փոխարեն)` 1 ) մեկանգամյա, 2) բազմակի օգտագործման, այդ թվում` անվճար կամ արտոնյալ պայմաններով տրամադրվող դեղերի համար:
Այս դեղատոմսով գրվում են պացիենտի երկարատեւ բուժումն իրականացնելու, քրոնիկ հիվանդություններով տառապող հիվանդների համար եւ նախատեսվում են գրել վեց ամսվա կտրվածքով: Ինչպես նաեւ նախագծով չի բացառում դեղերի բաց թողումը ոչ ամբողջական սպառողական փաթեթով՝ կախված պացիենտի հայեցողությունից:
Նախագծով պահանջ է դրվել, որ դեղատոմսերում դեղերը պետք է գրվեն համընդհանուր (ջեներիկ) անվանումներով: Կառավարություն ներկայացած փաստաթղթում գրված է՝ նախագծով պարզեցված է թմրամիջոցների նշանակման կարգը, ինչպես նաեւ դեղատոմսի ուժի մեջ լինելը՝ համաձայն «Թմրամիջոցների մասին օրենքի»: Նախագծով սահմանվել է՝ թմրամիջոցներ եւ հոգեմետ (հոգեներգործուն) նյութեր պարունակող դեղեր կարող են գրել բժշկական օգնություն եւ սպասարկում իրականացնող հաստատությունների ընտանեկան բժիշկները, ինչպես նաեւ պացիենտին բուժող բժիշկները` անկախ մասնագիտությունից:
Նելլի ԲԱԲԱՅԱՆ
