Ուսանողների բողոքի ցույցը ԱԺ-ի դարպասների մոտ շարունակվում է: Ուսանողները չեն հանում իրենց պաստառը ԱԺ-ի ճաղավանդակների վրայից: Ոստիկանները հորդորում են այն պահել ձեռքում, չփակցնել հատուկ պահպանվող օբյեկտ հանդիսացող խորհրդարանի դարպասների վրա:
«Հանուն գիտության զարգացման» նախաձեռնության անդամ Դավիթ Պետրոսյանը բանակցեց ոստիկանների հետ, նա ոստիկանության կապիտանին հորդորեց հստակ հղում անել կոնկրետ օրենքի կոնկրետ պահանջին:
Ոստիկանը պատասխանեց. «Հիմնավորումը կարող եք ցանկացածդ նայեք՝ Վարչական օրենսգրքի 172.2-ն է, բացեք նայեք՝ կտեսնեք: Փակցնողներին էլ մինչեւ անգամ վարչական պատասխանատվության կարանք ենթարկենք, բայց չենք ուզում տենց բան, էլի, Դավիթ ջան…Իրար հասկանալով անենք, կրկնեմ՝ չեմ ուզում տենց բան անեմ»:
Դավիթ Պետրոսյանը ուսանողներին ասաց, որ իրենց սկզբունքայնությունը պետք է վերաբերի օրինագծին եւ դրա կետերին, պաստառն ավելի լավ է հանեն: Նա նշեց, որ իրենք ցույց տվեցին, որ շատ արագ կարող են մոբիլիզացվել՝ գիշերով. «Սա մեր հաջողությունն է, ժողովուրդ: Պարզ է, որ մենք արժեքի ու գաղափարի համար ենք հավաքվել: Ինչ տեղի ունեցավ հակառակ կողմում, դա իրենց պարտությունն է, մեր պարտությունը չի»:
Ուսանողները ցավ հայտնեցին, որ իրենց այդպես էլ ԱԺ-ում մասնակից չդարձրեցին օրենքի քննարկմանը:
Պաստառը հանվեց, ուսանողները վերջում ծափերի ներքո վստահեցրին, որ տարկետում լինելու է ու հեռացան:
Հռիփսիմե ՋԵԲԵՋՅԱՆ
