Շենգավիթ վարչական շրջանի ընդհանուր իրավասության դատարանն այսօր մերժեց Շենգավիթի նախկին դատավոր, կաշառք ստանալու մեջ մեղադրվող Իշխան Բարսեղյանի պաշտպանների միջնորդությունը՝ դատաքննությունը կասեցնելու վերաբերյալ:
Բարսեղյանի պաշտպան Վարդուհի Էլբակյանը նիստից հետո Аravot.am-ին ասաց, որ մերժման որոշումը դատարանը իրենց դեռ չի տրամադրել. «Քսան րոպե մնաց խորհրդակցական սենյակում: Կայծակնային արագությամբ որոշում ընդունեց, ամեն ինչ կարելի է հասկանալ, բայց այդ միջնորդության վերաբերյալ որոշում ընդունելու համար քսան րոպե չէ, գոնե երկու ժամ կպահանջվեր, որ կարդար, համեմատական վերլուծությանը, նախադեպային որոշումներին ծանոթանալ»:
Դատական նիստն այսօր հետաձգվեց մեկ շաբաթով:
Հիշեցնենք, որ Իշխան Բարսեղյանին մեղադրանք է առաջադրվել, որ նա 1999 թվականից զբաղեցնելով Երևան քաղաքի Շենգավիթ վարչական շրջանի ընդհանուր իրավասության դատարանի դատավորի պաշտոնը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ՝ Նորիկ Հակոբյանի օգտին իր լիազորությունների շրջանակում գործողություններ կատարելու համար նրանից միջնորդի միջոցով պահանջել և անձամբ ստացել է խոշոր չափերով կաշառք:
Արփինե ՍԻՄՈՆՅԱՆ
