«Ազատություն» ռ/կ. Ռուսաստանի մի քանի տասնյակ քաղաքներում այսօր ընթանում են ընդդիմադիր գործիչ Ալեքսեյ Նավալնիի կողմնակիցների հավաքները: Դրանց ընթացքում ընդդիմադիր գործչի աջակիցները Նավալնիին առաջադրում են նախագահի պաշտոնում:
Առաջինը նրա առաջադրման օգտին քվեարկել են Վլադիվոստոկում կազմակերպված հավաքի մասնակիցները:
Մի քանի ժամ առաջ ավարտվել է Նավալնիի կողմնակցիների հավաքը Մոսկվայում, որի ավելի քան 700 մասնակիցները միաձայն կողմ են արտահայտվել ընդդիմադիր գործչի առաջադրմանը 2018-ի մարտին կայանալիք ընտրություններում:
Հավաքի ավարտին կազմակերպված ասուլիսի ընթացքում Ալեքսեյ Նավալնին հայտարարել է, որ ընդդիմադիր դաշտի միակ իրական թեկնածուն ինքն է: «Մյուս ընդդիմադիր թեկնածուներն, այդ թվում՝ Գրիգորի Յավլինսկին և Քսենիա Սոբչակը, չեն կարող առաջադրման համար անհրաժեշտ 100 հազար ստորագրությունները հավաքել», – հայտարարել է Նավալնին:
