Այսօր Ժիրայր Սեֆիլյանի եւ մյուսների գործով դատական նիստին պետք է հարցաքննվի «Սասնա ծռերի» գործում ներգրաված Պավել Մանուկյանը:
Դատավոր Տաթեւիկ Գրիգորյանը հարցրեց Պավել Մանուկյանին՝ ցանկանո՞ւմ է հարցաքննվել եւ պատասխանել դատարանի, դատավարական կողմերի հարցերին՝ հիշեցնելով, որ նա կարող է հրաժարվել:
Պավել Մանուկյանը պատասխանեց. «Ես Հայաստանում դատարան չեմ տեսնում, չի էլ լինելու, քանի գերագույն գլխավոր չարիքը իշխանության գլխին է: Կպատասխանեմ ոչ թե քո հարցին, այլ՝ իմ պաշտպանների: Եթե դուք ակնկալիք ունեք այս շինծու գործին՝ օդից նկարած, չգիտեմ…»: Նա ասաց, որ երկրի նախագահն է հրահանգել, դատավորին գցել կրակը: Դատավորը հորդորեց կոռեկտության սահմաններում լինել՝ Պավել Մանուկյանն արձագանքեց. «Ախր թարսի պես դեմս կին չլիներ նստած, ես ձեզ կոռեկտության սահմաններ ցույց կտայի: Ես գիտեմ, որ մեր դատական համակարգում չեն սիրում, երբ իրենց դիմում են իրենց արժանիքներով: Բնականաբար, հաշվի առնելով, որ դիմացս կին ա նստած, ես կփորձեմ, եթե, իհարկե, դուք չեք դրդի որոշ բաներ, իրեր իրենց անուններով կոչել»:
Պավել Մանուկյանն ասաց, որ սա գործ չի. «Դուք օդից ինչ-որ Բեն Լադեն եք փնտրում»:
Հռիփսիմե ՋԵԲԵՋՅԱՆ
