«Գագիկ Ծառուկյանը հանրապետությունում չէ, կվերադառնա`հանդիպման օրն ու ժամը հստակ կլինի»,- «Պոստ սկրիպտում» մամուլի ակումբում լրագրողների հարցերին ի պատասխան ասաց «Ծառուկյան» խմբակցության պատգամավոր Սերգեյ Բագրատյանը: Հարցերը վերաբերում էին նախագահի թեկնածու Արմեն Սարգսյանի եւ «Ծառուկյան» դաշինքի անդամների հանդիպմանը:
«Այն հարցերը, որոնք ուղղվելու են նախագահի թեկնածուին, լինելու են քաղաքական տրամաբանության մեջ: Նրա պատասխաններից է կախված մեր որոշումը: Վստահ եղեք, որ ցանկացած որոշում կշռադատված է լինելու եւ ի շահ ժողովրդի»,- ասաց պատգամավորը` չբացառելով, որ նաեւ Արմեն Սարգսյանին պաշտպանելու որոշում ընդունեն:
Սերգեյ Բագրատյանն Արմեն Սարգսյանին անձամբ չի ճանաչում, բայց անձերի մասին չի խոսում, անձերի հետ հույսեր չի կապում. «Դա քաղաքագիտական սխալ է, ինստիտուտները պիտի կայացնենք»: Նկատում է`ԵՄ-ի հետ համաձայնագրի հիմքը դա է. «Պիտի աշխատենք»:
Նելլի ԳՐԻԳՈՐՅԱՆ
