ՀՀԿ պատգամավոր Արմեն Աշոտյանն այսօր ԱԺ նիստում ՀՀ նախագահի թեկնածու Արմեն Սարգսյանի շուրջ քննարկման ժամանակ արձագանքեց «ԵԼՔ» խմբակցության պատգամավոր Մանե Թանդիլյանի դիտարկմանը, թե Արմեն Սարգսյանը միակ թեկնածուն է: «Այլընտրանքային ընտրության պարտադիր պայմանը հետկոմունիստական մտածողության հետեւանքն է: Դուք ունեք այլընտրանք՝ դեմ քվեարկելու»,-ընդգծեց Արմեն Աշոտյանը:
Նա նշեց, որ նախագահի պաշտոնում քաղաքական ուժերի կողմից ինքնանպատակ առաջադրումներ չեն եղել, իսկ այն քաղաքական ուժերը, որոնք ունեցել են իրենց թեկնածուին, համապատասխան քանակի քվորում չեն ունեցել՝ վերջինիս առաջադրման համար:
Աշոտյանն անդրադարձավ նաեւ «ԵԼՔ»-ի պատգամավորների՝ Արմեն Սարգսյանի քաղաքացիության շուրջ կասկածներին եւ մտահոգություններին:
«Արդյոք դա՞ է նախագահից ակնկալվող օրակարգը: Այլ բովանդակային հարցեր չկայի՞ն, որ կարելի է բարձրաձայնել, չէ՞ որ թեկնածուն ծավալուն ծրագրային ելույթով հանդես եկավ»,-նկատեց Արմեն Աշոտյանը:
Մանե Թանդիլյանն էլ ելույթում արձագանքեց Աշոտյանին. «Զարմացած եմ, թե ինչպես կարելի էր նսեմացնել ընտրության հնարավորությունը՝ այն «սովետական» կոչելով…Ժողովրդավարական ճանապարհով գնացող պետության համար ընդունելի չէ մեկ թեկնածուով գնալ նախագահի կարեւոր պաշտոնի ընտրությանը»:
Լուիզա ՍՈՒՔԻԱՍՅԱՆ
