Լրագրող Արկադի Բաբչենկոն չի մահացել, նրա սպանությունը բեմադրված է եղել: Այս մասին հայտնում է BBC-ն՝ վկայակոչելով Ուկրաինայի անվտանգության ծառայությանը:
Ուկրաինայի Անվտանգության ծառայության ղեկավար Վասիլի Գրիցակն այսօր հրավիրված մամուլի ասուլիսում հայտարարել է, որ լրագրողի սպանությունը իրենք են բեմադրել՝ իսկապես ծրագրված մահափորձը բացահայտելու համար: Նրա խոսքով այն ծրագրվում էր Ռուսաստանի հատուկ ծառայությունների կողմից: Այդ նպատակով վերջիններս հավաքագրել էին Ուկրաինայի քաղաքացու, որն արդեն ձերբակալվել է:
Դրանից հետո ասուլիսի սրահ է մտել ինքը՝ Բաբչենկոն: Նա հայտարարել է, որ արդեն երկու ամիս է՝ այդ գործը քննվում է: Իրեն զանգահարել և ասել էին, որ «իր վրա պատվեր կա»:
«Մարդիկ ասացին, որ քեզ վրա պատվեր կա: Գումարն արդեն վճարված է՝ 40 հազար դոլար: Ցույց տվեցին փաստաթղթեր, անձնագրային տվյալներ, իմ լուսանկարը, որը միայն իմ անձնագրում է: Հայտնի դարձավ, որ տեղեկատվությունը գալիս է Ռուսաստանից,- պատմել է լրագրողը:- Այդ տեղեկատվությունը կարող էին հավաքել միայն հատուկ ծառայությունները և միայն անձնագրային բաժնում»:
Բաբչենկոն ներողություն է խնդրել իր ընկերներից և կնոջից՝ պատճառած անհանգստության համար:
Պատրաստեց՝ Վիկտորյա ԱՆԴՐԵԱՍՅԱՆԸ