2016թ. ՀՀ ոստիկանության ՊՊԾ գունդը գրաված եւ մի շարք ծանր հանցագործությունների համար մեղադրվող «Սասնա ծռեր» խմբի անդամներից մի մասի գործով դատական նիստում այսօր դատավարության կողմերը լսեցին գործի նյութերում առկա ապացույցներից ռադիոհաղորդակցության ձայնագրությունները: ՊՊԾ գնդի գրավման օրերին ռադիոկապի միջոցով շփումներ են եղել զինված խմբի անդամների, ինչպես նաեւ՝ գնդի տարածքը շրջափակած ոստիկանների միջեւ: Խոսակցություններից մեկում խմբի անդամ, ազատամարտիկ Արայիկ Խանդոյանը՝ «Միայնակ գայլը», ռադիոկապով դիմում է ոստիկանության ծառայողին.
-Էտի մեր կրակոցները չեն, էտի ձեր սնայպերներն են մեր վրա աշխատում,-ասում է նա:
-Կրկնում եմ՝ մեր ծառայողն է զոհվել ձեր կրակոցից: Զենքերը վայր դրեք: Կամ հանձնվեք, կամ համարժեք պատասխան կստանաք,-արձագանքում է ոստիկանության ծառայողը:
-Մայո՜ր, ասում եմ՝ տենց բան չկա, մենք չենք կրակել: Էտ ձեր սնայպերներն են…Քանի պատերը չեք քանդել-ներս չեք մտել, մենք կրակողը չենք»,-լսվում է Խանդոյանի պատասխանը:
Մեկ այլ խոսակցության ժամանակ նա դիմում է զինված խմբի անդամներից Արեգ Կյուրեղյանին. «Արեգ ջան, ոչ մի կրակոց չլինի, մենակ ներխուժման դեպքում…ձեր տեղերը չմատնեք, ոչ մի բան չփորձարկեք»:
Հիշեցնենք, որ ՊՊԾ գնդի գրավման օրը եւ դրան հաջորդող ժամանակահատվածում երեք ոստիկան է զոհվել. սպանության մեղադրանքներ են առաջադրված խմբի անդամներից Արմեն Բիլյանին եւ Սմբատ Բարսեղյանին:
Այնուհետեւ որպես գործում առկա ապացույց դիտվեց տեսանյութ, որում ոստիկանական ծառայողական մեքենաներից մեկի ոչնչացման գործընթացն է: Երեւում է, թե ինչպես են զինված խմբի անդամներից մի քանիսը մեքենայով մոտենում բեռնատար-ծառայողական մեքենային, ինչ-որ գործողություններ անում բեռնախցիկի հատվածում, հետո հեռանում: Րոպեներ անց բեռնատարը կորում է ծխի, ապա՝ կրակի մեջ: Այնուհետեւ հրշեջ-մեքենա է մոտենում եւ փորձում հանգցնել այրվող բեռնատարը:
Դիտման ընթացքում դատավոր Մեսրոպ Մակյանը նախատեց ամբաստանյալներից Սմբատ Բարսեղյանին, որը տեղից խոսում էր ու ծիծաղում: «Ուրիշ հայտարարություններ չհնչեցնեք դատարանում,-ասաց նա Բարսեղյանին:
https://www.facebook.com/aravot.am/videos/2048826938469144/
Լուիզա ՍՈՒՔԻԱՍՅԱՆ
