Քիչ առաջ դատավոր Մեսրոպ Մակյանը որոշեց մերժել 2016թ. ՀՀ ոստիկանության ՊՊԾ գունդը գրաված «Սասնա ծռեր» զինված խմբի գործով ամբաստանյալ, ազատամարտիկ Պավել Մանուկյանի խափանման միջոց կալանքը փոխելու միջնորդությունը: Իսկ դա նշանակում է, որ Մանուկյանն ազատ չի արձակվի:
Թեեւ Մանուկյանի խափանման միջոցը փոխելու համար «Ծառուկյան» խմբակցության պատգամավորներ Վահե Էնֆիաջյանի եւ Շաքե Իսայանի երաշխավորագրերն էին ներկայացվել, միջնորդության քննության ժամանակ մեղադրող դատախազ Արամ Արամյանն առարկել էր՝ մատնանշելով՝ Մանուկյանն արել է հայտարարություն, որի հասցեատերերը հերքել են այն: Հետեւաբար, ըստ դատախազի, Պավլիկ Մանուկյանը փորձել է խեղաթյուրել փաստերը. «Նա մի փոքր շտապել է եւ չի համաձայնեցրել հայտարարությունը խմբի մյուս անդամների հետ»:
Մանուկյանի շահերի պաշտպան, փաստաբան Ազատ Շահբազյանը դատախազի հետ չէր համաձայնել. «Ասում են՝ երկրում իրավիճակ է փոխվել: Ուրեմն, Վաչագան Ղազարյանին եւ Յուրի Խաչատուրովին կարելի է գրավով ազատ արձակել, իսկ ազատամարտիկին՝ ո՞չ: Սա նշանակում է, որ դատարանի այս դահլիճում ոչինչ չի փոխվել»:
Պավլիկ Մանուկյանն էլ միջնորդության եւ իր հայտարարության առնչությամբ ասել էր. «Մեր մեջ ոչ մի ճաք չկա: Բայց ճշմարտությունը պետք է ասել: Ես շեղելու կարիք չունեմ, իմ պայքարը հանուն Հայաստանի է»:
«Սասնա ծռեր» խմբի անդամ, գործով մեղադրյալ Վարուժան Ավետիսյանն էլ այսօր հայտարարել է. «Պավել Մանուկյանը հուլիսից այլեւս չի համաձայնեցնում իր հայտարարությունները խմբի հետ եւ հանդես է գալիս իր տեսանկյունից»:
Ի դեպ, միջնորդությունը հրապարակելիս, դատավոր Մակյանը որպես պատճառաբանություն ներկայացրեց այն փաստը, որ Մանուկյանի կողմից նոր հանգամանքների մասին տեղեկություններ են հնչել, իսկ դա նշանակում է, որ գտնվելով ազատության մեջ՝ նա ապօրինի ներգործություն կարող է ունենալ գործով անցնող մյուս մեղադրյալների վրա:
https://www.facebook.com/aravot.am/videos/2123930607625443/%C2%A0
Լուիզա ՍՈՒՔԻԱՍՅԱՆ
