Գեղարքունիքի նորանշանակ մարզպետ Գնել Սանոսյանն այսօր կառավարության նիստից հետո լրագրողների հետ ճեպազրույցում ասաց, որ Գեղարքունիքի մարզն ամենամեծն է, եւ այս մարզի այն շրջաններում, որտեղ արտագնա աշխատանքի մեկնողների թիվը քիչ է, ապա աղքատության ցուցանիշը բարձր է, եւ հետեւաբար այն շրջաններում, որտեղից արտագնա աշխատանքի ավելի շատ են մեկնում, քիչ, թե շատ բարեկեցիկ են ապրում:
Սանոսյանի կարծիքով՝ արտագնա աշխատանքը երկակի ազդեցություն ունի՝ տնտեսական առումով ձեռնտու է, բայց մյուս կողմից ամիսներ շարունակ մարդիկ կտրվում են իրենց ընտանիքներից. «Մենք ունենք մարզի համաչափ զարգացման խնդիրներ, եւ դրանք կփորձենք լուծել: Գեղարքունիքի մարզից արտագնա աշխատանքի մեջ մի շատ դրական բան կա. մեկնածների 90%-ը վերադառնում է մարզ»:
Մարզպետն ասաց նաեւ, որ առաջնային է լինելու տարեցտարի արտագնա աշխատանքի մեկնողների թվի կրճատումը:
«Իմ ծանոթ բարեկամները թող ինձ ներեն, նրանք կհասկանան, որ ծանոթ-բարեկամների դարաշրջանն անցել է»,-ասաց մարզպետը՝ անդրադառնալով կադրային փոփոխություններին եւ ծանոթներին աշխատանքի ընդունելու նախկինների «սովորույթին»:
Սանոսյանը նաեւ վստահեցրեց՝ կադրային ջարդ չի լինելու, բայց որոշ աշխատակիցներ կազատվեն աշխատանքից, հավանաբար նաեւ՝ փոխմարզպետերը:
Նելլի ԲԱԲԱՅԱՆ