«Երբ ստացա մարզպետ աշխատելու հրավերն, անմիջապես այն ընդունեցի»,-այսօր կառավարության նիստից հետո լրագրողների հետ ճեպազրույցում ասաց Վայոց ձորի նորանշանակ մարզպետ Տրդատ Սարգսյանը: Նա պարզաբանեց, որ համաձայնել է այդ պաշտոնում աշխատել, քանի որ. «Վայոց ձորի բնակչությունը մշտապես իր դժգոհությունն էր հայտնում, որ հեղափոխությունը այնտեղ չի հասել, այդ պատճառով էլ, երբ ստացա մարզպետ աշխատելու հրավերն, անմիջապես այն ընդունեցի, որպեսզի հեղափոխության շունչն էլ հասնի մեր մարզ եւ վայոցձորցիներն էլ զգան այդ փոփոխությունը»։
Մանրամասնելով՝ ինչ է նշանակում հեղափոխությունը մարզ չի հասել, Սարգսյանն ասաց. «Այսինքն՝ այն վերաբերմունքը, որը բնակիչները չեն ստացել, նույն մարդիկ են եղել պաշտոնին, նախկին մարզպետը (Արագած Սաղաթելյան) եղել էր Հանրապետական, հետո դարձավ «Բարգավաճ Հայաստան» կուսակցության անդամ: Իսկ մարդիկ փոփոխություն էին ուզում»:
Սարգսյանը նաեւ վստահեցրեց՝ «Նախկին մարզպետի ժամանակ առերեւույթ բան չենք տեսել մարզպետի կատարածից»:
Նելլի ԲԱԲԱՅԱՆ
