Այսօր կառավարության շենքի մոտ ՀՀ ԳԱ ակադեմիայի Օրգանական եւ դեղագործական քիմիայի գիտատեխնոլոգիական կենտրոնի աշխատակիցները բողոքի ցույց էին անում: Գիտաշխատողները դժգոհում են կենտրոնի 2 մասնաշենքերն ու արտադրական մեկ հատվածի շենքն օտարելու վերաբերյալ կառավարության որոշումից եւ դրա համար մեղադրում են կրթության եւ գիտության նախարարի պաշտոնակատար Արայիկ Հարությունյանին:
«Կրթության եւ գիտության նախարարությունը կապ չունի այդ կենտրոնի հետ»,-այսօր կառավարության նիստից հետո լրագրողների հետ ճեպազրույցում վստահեցրեց Հարությունյանը: Նախարարի պաշտոնակատարի խոսքերով՝ նախարարությունն այս խնդրի լուծման առնչությամբ որեւէ մասնակցություն չունի, պետգույքի կառավարման վարչությունն ու գիտությունների ակադեմիայի լիազորությունների ներքո է:
Նա ասաց, որ նախարարությունը որեւէ լիազորություն չունի. «Ես ամռանը այցելել եմ այնտեղ: Իրենք միշտ վեճեր են ունեցել, այդ տարածքներում էլ եմ եղել, դրանք գրեթե չօգտագործվող տարածքներ են: Իրենք շատ մասնաշենքեր ունեն, որոնք կարող են օգտագործել»:
Հարությունյանը վստահեցրեց՝ նրանք կարող են պայմանավորվել, որպեսզի համապատասխան լաբորատորիաները մեկ այլ շինություն տեղափոխվեն:
Մանրամասն՝ տեսանյութում
Նելլի ԲԱԲԱՅԱՆ
