Aravot.am-ը Ազգային օպերային թատրոնի երգչախմբի գլխավոր խմբավար Կարեն Սարգսյանից հետաքրքրվեց` ինչո՞ւ է հրաժարվում իր հետ աշխատել արտիստների մի մասը, որոնք պատրաստվում էին նաեւ ասուլիսով հանդես գալ, եթե իրենց պահանջը չբավարարվեր:
Խմբավարը հայտնեց, որ ինքը դիմում է գրել. «Չուզեցին ինձ հետ աշխատել, ես էլ գնացի, որ իրենք մնան: Թատրոնի տնօրեն և գեղարվեստական ղեկավար Կոնստանտին Օրբելյանը կիրակի օրն է վերադառնալու: Չգիտեմ, կստորագրի՞, թե՞ ոչ, բայց ես արդեն հոգնել եմ այս ամենից»:
Հարցրինք, թե ի՞նչ է դժգոհողների ուզածը: «Իրենք էլ չեն կարողանում ձեւակերպել, թե ինչ են ուզում: Առանձնապես լուրջ բան չկա, ուղղակի չեն ենթարկվում, փորձերին փորձում են չմասնակցել, ասելով, որ իբր իրենց վիրավորում եմ, նվաստացնում, իրականում այդ բոլորը սուտ է: Հիմա նույն վիճակն է տիրում բոլոր թատրոններում` Սունդուկյանում, Համազգայինում, ամեն տեղ այս տեսակ իրավիճակ է…»,- նշեց մեր զրուցակիցը, որին Կոնստանտին Օրբելյանն էր տարիների ընդմիջումից հետո հրավիրել օպերային թատրոն:
«Ես դիմում գրեցի, որ հանգստանան, ու իմ պատճառով մի 15-20 հոգի գործից չզրկվեն»,- ասաց Կարեն Սարգսյանը:
Հիշեցնենք, որ նա տարիներ շարունակ ղեկավարել է ԵՊՀ երգչախումբը, հիմնել է «Տղամարդկանց երգչախումբը»: 1993 թ. Սիդնեյ քաղաքի հայ համայնքը Կարեն Սարգսյանին հրավիրել է աշխատելու «Կոմիտաս» երգչախմբի և Սիդնեյի սիմֆոնիկ նվագախմբի հետ:
Կարեն Սարգսյանը 1994 թվականից Ալ. Սպենդիարյանի անվան օպերայի և բալետի ազգային ակադեմիական թատրոնի գլխավոր խմբավարն էր: Նրա ղեկավարությամբ երգչախումբը հանդես է եկել աշխարհի շատ երկրներում` ԱՄՆ-ից մինչեւ Լիբանան:
2014 թ., ընդհատելով գործունեությունն օպերային թատրոնում, Ամենայն Հայոց Գարեգին Բ կաթողիկոսի հրամանով սկսել էր ղեկավարել Երևանի Գրիգոր Լուսավորիչ եկեղեցու և հոգևոր ճեմարանի երգչախումբը եւ 2017 թ. հունիսից՝ Ալ. Սպենդիարյանի անվան օպերայի և բալետի ազգային ակադեմիական թատրոնի տնօրեն և գեղարվեստական ղեկավար Կոնստանտին Օրբելյանի հրավերով վերադարձել է օպերային թատրոն` ղեկավարելու թատրոնի երգչախումբը:
Գոհար ՀԱԿՈԲՅԱՆ
Լուսանկարը` wikipedia.org-ից:
