«Կարծում եմ, վերջնագրերով խոսելու տարբերակը, որը ընտրվել է, թե չեն գնա դպրոց, մինչեւ տնօրենը չհեռանա, ճիշտ չէ: Բոլոր խնդիրները հնարավոր է լուծել, բայց ոչ վերջնագրերով եւ ոչ իրենց երեխաների կրթական իրավունքները խախտելով»,- խորհրդարանում, լրագրողների հետ զրույցում այսօր ասաց ՀՀ կրթության եւ գիտության նախարար Արայիկ Հարությունյանը`անդրադառնալով Արարատի մարզի, Ավշար գյուղի դպրոցում շարունակվող բողոքի ակցիաներին:
«Երեկ էլ, այսօր էլ նախարարության ներկայացուցիչներ են եղել այնտեղ. կփորձենք վերականգնել աշակերտների իրավունքը, բայց այդ հարցում ծնողները պետք է աջակցեն մեզ»,- ասաց նախարարը:
Հիշեցնենք, որ ծնողները բողոքում են, իբրեւ մարզպետն իր բարեկամուհուն է նշանակել դպրոցի ուսմասվար: Արայիկ Հարությունյանը հերքում է. «Ի՞նչ ուսմասվար, այնտեղ որեւէ ուսմասվար չի նշանակվել: Մորաքրոջ հարսին իբր պետք է բերեին այդտեղ նշանակելու, բայց չի եղել նման բան»:
Նախարարը հորդորում է ուսումնասիրել ԿԳՆ-ի անցկացրած մրցույթները եւ ակնհայտ կդառնա, որ խնամի-բարեկամական կապերով որեւէ մրցույթ չի կայացել:
Նելլի ԳՐԻԳՈՐՅԱՆ
