Այսօր կառավարության նիստից հետո լրագրողներն ԱԱԾ տնօրեն Արթուր Վանեցյանից հետաքրքրվեցին նրա մորն աշխատանքից ազատելու մասին:
Օրերս Փաշինյանի հանձնարարականով Վանեցյանի մայրը՝ Մարգարիտա Ազարյանն ազատվել է վարչապետի աշխատակազմի կադրերի եւ անձնակազմի կառավարման վարչության պետի պաշտոնից: Ըստ վարչապետի մամուլի խոսնակի, պաշտոնանկության պատճառը վարչապետի հանձնարարականը չկատարելն էր:
Արթուր Վանեցյանը մորն աշխատանքից ազատելու մասին ասաց՝ «Նա ազատվել է աշխատանքից իր դիմումի համաձայն: Բայց ես չեմ ուզում դա քննարկել, որովհետեւ վարչապետի որոշումներն, առհասարակ, չեն քննարկում, այլ պետք է կատարվեն: Վարչապետի խոսնակի մեկնաբանությունը ես որեւէ ձեւ մեկնաբանելու ցանկություն չունեմ: Եվ այս գործընթացը մի անձնավորեք: Իմ մայրն աշխատել է պետական համակարգում երկար ժամանակ, այն ժամանակ, երբ ես դպրոցական էի: Շարունակել է աշխատել պետական համակարգում, այն ժամանակ, երբ ես նշանակվել եմ ԱԱԾ տնօրեն եւ մի կապեք իմ ու մորս աշխատանքը»:
Առողջապահության փոխնախարարին կաշառք ստանալու կասկածանքով ձերբակալության մասին էլ, լրագրողների հարցին ի պատասխան, Վանեցյանն ասաց, որ կաշառք տվողին էլ է՝ մանկաբարձ-գինեկոլոգ Ռազմիկ Աբրահամյանին առաջադրվել մեղադրանք, սակայն հաշվի առնելով առողջական վիճակը, ընտրվել է խափանման միջոց՝ ստորագրություն՝ չհեռանալու մասին:
Արդյոք Ռազմիկ Աբրահամյանն ինքն է նախապես հայտնել, որ իրենից կաշառք են պահանջել, ու որ պատրաստվում է այն փոխանցել փոխնախարար Արսեն Դավթյանին, այս հարցին ի պատասխան՝ Վանեցյանն ասաց, որ եթե Աբրահամյանն այդ մասին հայտներ, նրան մեղադրանք չէր առաջադրվի:
Մանրամասն՝ տեսանյութում
Նելլի ԲԱԲԱՅԱՆ
