Իրինա Ռոդնինայի անվան գեղասահքի մարզադպրոցում ավարտվեց գեղասահքի Հայաստանի բաց առաջնությունը, որին բացի Հայաստանի շուրջ 80 մարզիկներից մասնակցեցին նաեւ յոթ երկրների սահորդներ, ընդհանուր առմամբ՝ 103 գեղասահորդ:
Հայաստանի գեղասահքի ֆեդերացիայի նախագահ Մելանյա Ստեփանյանը նշեց, որ ընդհանուր առմամբ առաջնությունը ստացվեց եւ մեր մարզիկները վատ հանդես չեկան: Մասնագետի խոսքով, առայժմ միայն բաց առաջնություն կազմակերպելով է հնարավոր տեղի մարզիկների միջեւ մրցակցություն ապահովել, հակառակ դեպքում պայքարը կընթանա միայն Իրինա Ռոդնինայի անվան մարզադպրոցի սաների միջեւ: «Մեր մարզիկները լավ հանդես եկան եւ, կարծում եմ, արդեն կարելի է Հայաստանի հավաքական թիմ ունենալ, որպեսզի մեր պատանի գեղասահորդները մասնակցեն միջազգային մրցումների»,-ասաց Մելանյա Ստեփանյանը եւ ավելացրեց, որ արդար մրցավարությանը եւ ավելորդ անհամաձայնություններից խուսափելուն մեծապես նպաստեցին դրսից հրավիրված մրցավարները:
Հայաստանի առաջատար գեղասահորդներից մրցմանը մասնակցեց միայն Սլավիկ Հայրապետյանը, իսկ ահա Անաստասիա Գալուստյանը միայն վերջին պահին հարգելի պատճառով չժամանեց Երեւան:
Կարդացեք նաև
Հաղթողներին եւ մրցանակակիրներին պարգեւատրեցին Հայաստանի սպորտի եւ երիտասարդության հարցերի նախարարի պարտականությունները կատարող Գաբրիել Ղազարյանը, ISU-ի փոխնախագահ Ալեքսանդր Լակերնիկը, աշխարհահռչակ մարզիչ, մեր հայրենակից Ռաֆայել Հարությունյանը եւ Մելանյա Ստեփանյանը:
Աշոտ ՀԱԿՈԲՅԱՆ