ԱՄՆ կոնգրեսական Ֆրանկ Փալոնը ներկայացրել է բանաձև՝ ողջունելով Հայաստանի 2018թ. խաղաղ քաղաքական անցումը, ԱՄՆ-Հայաստան «ռազմավարական գործընկերությունը» և կոչ անելով երկկողմ գործակցության քաղաքական, տնտեսական, ռազմական ոլորտներում: Այս մասին ասվում է Ամերիկայի հայ դատի տարածած հաղորդագրության մեջ:
«Թավշյա հեղափոխությունն իր վերջնակետին հասավ 2018թ. դեկտեմբերի 9-ին՝ ազգային խորհրդարանական ընտրություններով, որոնք համաձայն ԵԱՀԿ դիտորդական առաքելության, անցկացվեցին հիմնարար ազատությունների նկատմամբ հարգանքով և վայելում էին հանրային լայն վստահություն, ինչը պետք է պահպանվի հետագա ընտրական բարեփոխումների միջոցով»,- ասվում է բանաձևի տեքստում:
Դրանում նաև կոչ է արվում ԱՄՆ-ին օգնել հայ ժողովրդին ամրապնդելու ձեռք բերած առաջընթացը՝ ուժեղացնելով ԱՄՆ-Հայաստան կապերը երկկողմ այցելությունների, պաշտպանության ոլորտում խորհրդատվությունների միջոցով, ամրապնդել գործակցությունը միջազգային խաղաղապահական գործողություններում, աջակցել կուսակցությունների զարգացմանը, թափանցիկությանը, օրենքի գերակայությանը, քաղհասարակության զարգացմանը և մամուլի ազատությանը:
«Վերջին տարում Հայաստանն անցնում էր տեղական շարժման միջով, որը հանգեցրեց ոչ բռնի թավշյա հեղափոխության և դեկտեմբերին ազատ և բաց ազգային ընտրությունների: Այդ նշանակալի իրադարձություններն ապացուցում են հայ ժողովրդի հավատարմությունը ժողովրդավարությանը և ցույց են տալիս, թե ինչու է այդքան կարևոր ԱՄՆ-ի համար բարձրացնել մեր գործակցությունը Փաշինյանի կառավարության հետ: Հայաստանն ապրում է կարևորագույն պահ, երբ ԱՄՆ-ի աջակցությունը կարող է օգնել խթանելու ժողովրդավարության ուղղությամբ աշխատող և քաղհասարակության ինստիտուտների աճը: Ես լիահույս եմ, որ այս բանաձևը սկիզբն է ԱՄՆ-ի և Հայաստանի միջև գործընկերության լայնածավալ ռազմավարական թարմացման՝ հիմնված մեր ընդհանուր շահերի և արժեքների վրա… Ես կշարունակեմ հավելյալ աշխատել իմ գործընկերների հետ ԱՄՆ-ի կողմից Հայոց ցեղասպանության ճանաչման ուղղությամբ»,- իր ելույթում ասել է Փալոնը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
