«2019-ից առ այսօր քրեակատարողական հիմնարկներում գրանցվել է 13 մահվան դեպք»,- «Մեդիա կենտրոնում» հրավիրված «Մահվան դեպքեր բանտերում․ բուժսպասարկման հասանելիության խնդիրները ՔԿՀ-ներում» թեմայով քննարկմանը հայտարարեց ՀՀ ԱՆ Քրեակատարողական ծառայության բժշկական սպասարկման բաժնի պետի տեղակալ Անդրանիկ Բաղդասարյանը:
Մանրամասնելով՝ հիմնականում ինչ հիվանդությունների հետ են կապված եղել մահվան դեպքերը՝ Անդրանիկ Բաղդասարյանն ասաց. «Հիմնականում որպես կանոն հիվանդությունների հետ կապված տեղ են գրավում սիրտանոթային համակարգի հիվանդությունները: Մահվան դեպքերից 5-ը սիրտանոթային հիվանդություններով են, գլխուղեղային արյան շրջանառության մեկ դեպք է գրանցվել, ինքնասպանության երկու դեպք է գրանցվել, սուր լեյկոզ՝ ուռուցքային հիվանդություններով՝ մեկ դեպք, գազտրոէնտերոլոգիական հիվանդություններով՝ երկու դեպք և այլ հիվանդություններով երկու դեպք»:
Համեմատելով նախորդ տարիների տվյալների հետ՝ Անդրանիկ Բաղդասարյանը նշեց. «2013-ից սկսած առյուծի բաժինը մահվան դեպքերի ընկնում է քաղաքացիական բուժհաստատություններում տեղի ունեցածներին: Դատապարտյալը, ունենալով հիվանդություն, հիվանդությունն արձանագրվել է, բնականաբար համապատասխան բուժօգնություն ցուցաբերելուց հետո դրական արդյունք չի գրանցվել, և նա մահացել է: Մահացության ինը դեպքերն արձանագրվել են քրեակատարողական հիմնարկներում, դատապարտյալների հիվանդանոցում՝ երկու դեպք, Արմավիր քրեակատարողական հիմնարկում գրանցվել է չորս դեպք, Հրազդան քրեակատարողական հիմնարկից քաղաքացիական բուժհիմնարկում գրանցվել է մեկ դեպք»:
ՀՀ ԱՆ Քրեակատարողական ծառայության բժշկական սպասարկման բաժնի պետի տեղակալի ներկայացմամբ՝ վիճակագրությունն այսպիսին է. «2018 թվականին ունեցել ենք 18 մահվան դեպք, 7-ը՝ քաղաքացիական բուժհաստատություններում, 2017-ին՝ 17 մահվան դեպք՝ ութը քաղաքացիական բուժհաստատությունում: 2011-ին ունեցել ենք հինգ մահվան դեպք՝ կիսամյակային, 2012-ին 3 մահվան դեպք՝ կիսամյակային»:
Կարդացեք նաև
ՀՀ ԱՆ ՔԿՀ-ներում հասարակական վերահսկողություն իրականացնող հասարակական Դիտորդների խմբի նախագահ Հասմիկ Հարությունյանի գնահատմամբ՝ այս պահին մահացության դեպքերի հետ կապված իրավիճակը մտահոգիչ է. «Միայն 2019-ի հուլիսի դրությամբ մենք ունենք 13 դեպք, 2018-ի 18 դեպքերի փոխարեն: Իրավիճակը ցույց է տալիս, որ մահվան դեպքերի աճ է տեղի ունեցել: Կան ակնհայտ ու տեսանելի պատճառներ, որոնց մասին մենք բազմիցս խոսել ենք: Մինչդեռ յուրաքանչյուր ազատազրկված պետք է ունենա այնպիսի բժշկական օգնության հասանելիություն, ինչ մեզնից յուրաքանչյուրը»:
Հասմիկ Հարությունյանի կարծիքով՝ մահվան դեպքերով արդյունավետ քննություն չի իրականացվում, որ վերհանվեն պատճառները. «Պատճառների վերահանումը թերի է: Այդ դեպքում մենք կարող էինք արձանագրել դեպքեր, որ հնարավոր է՝ բուժանձնակազմի կողմից ուշացում է եղել բուժօգնության կամ պարզվի, որ անձը չպետք է այդ առողջական վիճակով պահվեր անազատության մեջ»:
Ըստ Հասմիկ Հարությունյանի՝ հոգեբանական ոչ պատշաճ օգնությունը հաճախ հանգեցնում է դատապարտյալների ինքնասպանության. «Օրինակ՝ միջինը 500-600 ազատազրկված անձ ունեցող հիմնարկի համար ունենում ենք հոգեբանի մեկ հաստիք, իսկ դա չի կարող արդյունավետ լինել, գոնե հարյուր հանձի համար մեկ հոգեբանի հասանելիություն մշտապես պետք է լինի 24-ժամյա ռեժիմով»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
