Կհետաձգվի՞ հանրաքվեն կորոնավիրուսի պատճառով: Այսօր ԱԺ-ում լրագրողներն այս հարցն ուղղեցին «Իմ քայլի» պատգամավոր Հրաչյա Հակոբյանին: Նա պատասխանեց. «Դեռ վաղ է խոսել հանրաքվեի հետաձգման մասին, դեռ մեկ ամիս ժամանակ ունենք ու չգիտենք՝ ինչ ընթացք կստանա վիրուսի տարածումը կամ նահանջը: Եթե նահանջի, ամբողջությամբ վերահսկելի լինի, կարելի է հանրաքվեն չհետաձգել, բայց եթե ավելի սրվի, կարծում եմ, կարելի է դիտարկել հետաձգման պրոցեսը»:
Մենք փոխանցեցինք ԲՀԿ առաջնոր Գագիկ Ծառուկյանի դժգոհությունը կորոնավիրուսի հետ կապված իշխանության քայլերից, որ մեկ ամիս առաջ այդ վիրուսն ամբողջ աշխարհում տարածվել էր, պետք է հանձնարարականներ տրվեին, բայց պարզվեց՝ անգամ դեղատներում ախտահանիչ միջոցներ ու դիմակներ չկան, ընդունո՞ւմ եք այդ քննադատությունը՝ Հրաչյա Հակոբյանը պատասխանեց. «Չեմ ընդունում, բոլոր քայլերը ձեռնարկեցինք: Ինչպես տեսնում ենք, ուղղակի այդ չարաբաստիկ վիրուսը բոլոր տեղեր փորձում է ներթափանցել, ինչը եղավ նաեւ Հայաստանի դեպքում»: Ըստ նրա, դեղատներում դիմակ չլինելը պայմանավորված էր նրանով, որ ուռճացրել էին հարցը:
Մենք նաեւ փոխանցեցինք Ծառուկյանի այլ դժգոհությունը՝ դա էլ հո տնտեսությո՞ւն չի, որ չհասկանաք, բա չգիտեի՞ք, որ կորոնավիրուսը 14 օր կարանտին ունի, ինչի՞ թողեցիք այդ մարդիկ գան տուն, տանեցիների հետ շփվեն, Հրաչյա Հակոբյանը պատասխանեց. «Մենք տնտեսությունից էլ ենք հասկանում, առողջապահությունից էլ, ամեն ինչ շատ վերահսկելի է, քան փորձում են խուճապի միջոցով տարածել»:
Կարդացեք նաև
Հռիփսիմե ՋԵԲԵՋՅԱՆ
