«Օրավարձով աշխատող հասկացություն ՀՀ-ում չկա, կան գրանցված եւ չգրանցված աշխատողներ: Գրանցվածները կզգան կարգավիճակի առավելությունը»,-ԱԺ-կառավարություն հարցուպատասխանի ժամանակ այսօր անդրադառնալով խնդրին, թե կորոնավիրուսի ճգնաժամի պատճառով օրավարձով աշխատողներն ինչպե՞ս են ապրելու, եթե աշխատանք չունեն, հայտարարեց վարչապետ Նիկոլ Փաշինյանը:
Նա նշեց. «Օրավարձով աշխատողները, որոնք ստվերում են եղել, թքած են ունեցել օրենքի վրա, հիմա նույնականացման խնդիր են ունենալու: Բայց մենք համարում ենք, որ նրանք մեր քաղաքացիներն են, եւ պարտավոր ենք օգնել: Նրանք ոչ այնքան պաշտպանված խավում են, ուստի մեր տվյալներում պետք է արտացոլված լինեն: Օրինակ՝ փարոսում: Խոսքը նաեւ փարոսում դեռեւս չընդգրկվածների մասին է, որոնք դիմել են արդեն: Մենք պատրաստ ենք նրանց օգնել, բայց գտնելու խնդիր ունենք: Նրանք աշխատել են, եկամուտ ստացել, բայց չեն հայտարարագրել եկամուտները: Չվճարած եկամտահարկի պատճառով մենք նրանց չգտնելու խնդիր ունենք: Նրանք չեն կարողանալու ապացուցել, որ աշխատել են: Օրինապահ քաղաքացու կարգավիճակն անհրաժեշտություն է բոլոր դեպքերում»:
Լուիզա ՍՈՒՔԻԱՍՅԱՆ
