ՀՀ վարչապետի աշխատակազմի ղեկավար Էդուարդ Աղաջանյանը տեղեկացրեց, որ «Հիշում ենք և պահանջում» կարգախոսը չի փոխվի: ՀՀ կառավարության մամուլի կենտրոնում տեղի ունեցած մամուլի ասուլիսին Էդուարդ Աղաջանյանը հայտնեց, որ կարգախոսի հետ կապված քննարկում է տեղի ունեցել և նշեց. «Որոշում է կայացվել, որ կարգախոսը չփոխվի՝ առնվազն այս պահին հաշվի առնելով ժամանակի սղությունը, քանի որ կարծում ենք՝ նման որոշում կայացնելու համար խորը, երկար քննարկումներ պետք է լինեն, որ ցանկացած փոփոխություն հիմնավորված, բացատրելի, հասկանալի լինի հանրության համար»:
ՀՀ ԱԳ նախարար Զոհրաբ Մնացականյանն ասաց, որ հարցը համահայկական է և վերաբերում է յուրաքանչյուր հայի ու պարզաբանեց. «Նշված կարգախոսը համահայկական է՝ հիշում եմ և պահանջում, որն ընդունվել է համահայկական հռչակագրի միջոցով: Որևէ այլ կերպ մոտենալն անհնար է: Սա համահայկական հարց է, որի շուրջ որոշումներն ընդունվում են հայմահայկական ձևաչափի մեջ»:
ԿԳՄՍ նախարար Արայիկ Հարությունյանն էլ տեղեկացրեց՝ որոշումը կայացվել է՝ պայմանով, որ քննարկումները կշարունակվեն:
Կարդացեք նաև
Լրագրողների մտահոգությանը՝ Հայոց ցեղասպանության զոհերի հուշահամալիրի տարածքը տրվում է Երևան համայնքին, արդյոք մտավախություն չկա՞, որ այդ տարածքները կօգտագործվեն առևտրային գործունեության համար, Արայիկ Հարությունյանը պատասխանեց. «Մենք այդ խնդրին կանդրադառնանք առաջիկայում: Որևէ նման բան չկա, որ տարածքները տրվում են առևտրային գործունեության համար: Այդ ամբողջ տարածքն իր ամբողջությամբ մեզ համար շատ խորհրդանշական է: Որևէ նպատակային փոփոխություն այստեղ լինել չի կարող, մնացածը տեխնիկական հարցեր են: Մեր նպատակն է, որ տարածքն ապրի, զարգանա, անտառը զարգանա, և մենք այդ ուղղությամբ ջանքեր չենք խնայելու»:
Տաթև ՀԱՐՈՒԹՅՈՒՆՅԱՆ
