Aravot.am-ը ԿԳՄՍ նախարարի տեղակալ Գրիշա Թամրազյանից հետաքրքրվեց՝ ինչպե՞ս կմեկնաբանի այն տեղեկությունները, որ ԲՈԿ-ի՝ հրաժարական տված նախագահ Սմբատ Գոգյանի հետ տղայական խոսակցություն է ունեցել վերջինիս տան մոտ, որն, ի դեպ, Գոգյանը չի հերքել «Հրապարակի» հետ զրույցում:
«Չեմ հերքում, որ Սմբատ Գոգյանի հետ զրույց եմ ունեցել, բայց նրա հետ տղայական, տղամարդկային խոսակցություն ունենալ չէի կարող, դա ուղղակի աբսուրդի ժանրից է»,-ասաց ԿԳՄՍ փոխնախարարը:
Դիտարկմանը, որ ըստ տեղեկությունների, իրենց զրույցի պատճառն այն է, որ Սմբատ Գոգյանը Հայաստանի պետական տնտեսագիտական համալսարանի ռեկտորի պաշտոնակատար Դիանա Գալոյանի ատենախոսությունում թերություններ է մատնանշել, Գրիշա Թամրազյանը պատասխանեց. «Սմբատ Գոգյանը ոչինչ չի կարող նշել, քանի որ չի եղել այդ հանձնաժողովի անդամ: Թեեւ նրան մի քանի անգամ առաջարկվել է լինել այն հանձնաժողովի անդամ, որն ուսումնասիրում էր Դիանա Գալոյանի ատենախոսությունը, բայց ինքը հրաժարվել է: Սմբատ Գոգյանի տեղակալին ենք փորձել ներգրավել, նա էլ է հրաժարվել, եւ իրենք առաջարկել են ԲՈԿ-ի վարչության պետին:
Մի քանի օր է՝ հերյուրանքներ են տարածվում մամուլով, այսպես կոչված չակերտավոր կրթության փորձագետների կողմից: Ես կասկածում եմ, որ նրանք իսկապես փորձագետներ են, քանի այդ հերյուրանքները սիրով տարածում են իրենց ֆեյսբուքյան էջերով: Իսկ իրողությունը մեկն է՝ հանձնաժողով է ձեւավորվել ԿԳՄՍ նախարարությունում, հանձնաժողովն իր եզրակացությունը տվել է Դիանա Գալոյանի դոկտորական ատենախոսության վերաբերյալ, եւ արձանագրել է այն, ինչ արձանագրել է, եզրակացությունն էլ սիրով տրամադրել ու տրամադրում ենք բոլոր դիմողներին»:
Կարդացեք նաև
Հետաքրքրվեցինք՝ իր կարծիքով ո՞րն է պատճառը, որ թիրախավորում են ինքն ու Դիանա Գալոյանը: «Ես Դիանա Գալոյանին ճանաչում եմ շուրջ 13 տարի, ծնվել-մեծացել եմ մի թաղամասում, որտեղ բնակվում է նրա ընտանիքը: Ես նրա ընտանիքի հետ ունեմ ջերմ հարաբերություններ: Արաբկիր համայնքում, որտեղ ես ծնվել-մեծացել եմ, շատերի հետ ունեմ բարիդրացիական հարաբերություններ, այնպես որ Դիանա Գալոյանենց ընտանիքը եւս բացառություն չէ:
Քանի որ իմ մագիստրոսական կրթությունն էլ ստացել եմ տնտեսագիտական համալսարանում, այդտեղից էլ են մեր կապերն ավելի ամրապնդվել: Բացի այդ, 2008 թ. Համաժողովրդական շարժում եւ այլն …Նաեւ Դիանա Գալոյանի մայրը՝ տիկին Զոյա Թադեւոսյանը Արաբկիր համայնքում առաջադրվել էր թաղապետի թեկնածու, որի աջակիցներից եմ եղել 2009 թվականին…»,- մանրամասնեց ԿԳՄՍ փոխնախարարը:
Նա զրույցի ավարտին նորից շեշտեց. «Այնպես որ, աբսուրդի ժանրից է Սմբատ Գոգյանի հետ տղամարդկային խոսակցություն ունենալը: Մենք տեսակով շատ տարբեր ենք»:
Գոհար ՀԱԿՈԲՅԱՆ
