«5800-ից ավելի քաղաքացի է պատվաստվել երեկվա դրությամբ։ Գործընթացը սահուն է։ Իհարկե, գոհ չենք ցուցանիշներից եւ ամեն ջանք թափում ենք, որ պատվաստման տեմպերը բարձրանան»,-կառավարություն-ԱԺ հարցուպատասխանի ժամանակ այսօր անդրադառնալով կորոնավիրուսի դեմ պատվաստման գործընթացին՝ ասաց առողջապահության նախարարի պաշտոնակատար Անահիտ Ավանեսյանը։
«Այդ քաղաքացիներից որեւէ մեկի մոտ որեւէ լուրջ հետեւանք չի արձանագրվել։ Բուժաշխատողները պատվաստվելուց հետո զանգում են քաղաքացիներին եւ գրանցում են գանգատները։ Բայց որեւէ անցանկալի հետեւանք չի գրանցվել»,-հավելեց Անահիտ Ավանեսյանը։ Նա նաեւ նշեց, որ ՀՀ է մատակարարվել նաեւ չինական արտադրության պատվաստանյութը, որը շուտով կիրացվի։ ԱԺ փոխնախագահ Ալեն Սիմոնյանն էլ ասաց, որ Լենա Նազարյանն արդեն իսկ դրանով է պատվաստվել, ինքն է պատրաստվում։
Լուիզա ՍՈՒՔԻԱՍՅԱՆ