«Մեդիա կենտրոնում» հրավիրված հարցազրույց-ասուլիսի ժամանակ Հայաստանում Նիդերլանդների արտակարգ և լիազոր դեսպան Նիկոլաս Սխերմերսն ասաց՝ հույս ունի, որ շուտով մարդիկ հնարավորություն կունենան երկկողմանի ճամփորդել առանց որևէ դժվարությունների ու նշեց. «Շուտով դրական որոշում կկայացվի, և ՀՀ բնակիչներին վիզաներ կտրամադրվեն»:
Դեսպանի համոզմամբ՝ ՀՀ-ին պայծառ ապագա է սպասվում: Նա ասաց. «Հայաստանի շատ կարևոր առավելությունն է այն, որ հենց երկրում արդեն իսկ գործող ժողովրդավարության մասին արդեն նշել եմ»: Դեսպանը հիշեց՝ ընտրություններից առաջ, երբ իր բնորոշմամբ՝ ՀՀ-ում քաղաքական վայրիվերումներ տեղի ունեցան, իր գործընկերները հարցնում էին, թե ՀՀ-ում ինչ իրավիճակ է տիրում. «Ես պատասխանում էի՝ Հայաստանում ընդամենը տեսնում ենք, որ ժողովրդավարությունը կյանքի կոչվեց, մարդիկ խոսում են, բարձրացնում իրենց ձայնը: ՀՀ-ում ժողովրդավարության կառույցները ամուր, դիմացկուն են, իրենց աշխատանքը լավ են իրականացնում: ՀՀ-ի համար սա շատ կարևոր առավելություն է»:
Խոսելով ՀՀ-ԵՄ Համապարփակ և ընդլայնված գործընկերության համաձայնագրի մասին, որն ուժի մեջ է մտել 2021-ի մարտին, դեսպանն ասաց. «ՀՀ-ն արդեն իրականացնում է համաձայնագրի բոլոր դրույթները, բայց ՀՀ-ն նաև ԵԱՏՄ անդամ է, որը էլի մեծ հետաքրքրություն է առաջարկում այլ երկրների ներդրողների համար: Սա իրոք լուրջ առավելություն է ներդրողների համար: Ինչ վերաբերում է ներդրումներին, ապա բոլոր այն մարդիկ, որոնք հետաքրքրվածություն ունեն ՀՀ-ում ներդրումներով, այնպես չէ, որ սպասում էին համաձայնագրի՝ պաշտոնապես ուժի մեջ մտնելուն: Այնպես որ, հիմնական մարտահրավերն է հասկանալ՝ ինչպես անել, որ ՀՀ-ի համար առավելագույնս արդյունավետ լինի»:
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի