«Ուժով կարող ենք ամբողջ շենքը վերցնել եւ դրոշը կախել, բայց մենք այդ ճանապարհով չենք գնում: Քիչ հետո ոստիկանությունը մեզ կպատասխանի իր որոշումը եւ մենք կորոշենք, թե ինչ ենք անում»,- ԱԳՆ շենքի մոտ հայտարարեց ՀՅԴ-ական ԱԺ փոխնախագահ Իշխան Սաղաթելյանը:
Այդ ընթացքում ցուցարարները վանկարկում էին՝ «Նիկոլ դավաճան», «Արցախ»: Արթուր Վանեցյանն ու Իշխան Սաղաթելյանը ցուցարարներին անընդհատ հանդարտություն պահպանելու կոչեր էին անում:
Ապա` Իշխան Սաղաթելյանը հայտարարեց, որ «մեր առաջ որեւէ փակ դուռ չկա», ցուցարարներին հորդորեց մեկ քայլ ետ գնալ, իսկ ինքը Արցախի դրոշը կտեղադրի ԱԳՆ շենքում, որից հետո խաղաղ երթը կշարունակեն:
Ցուցարարների ծափերի եւ «Արցախ» վանկարկումների ներքո, Արցախի դրոշը տեղադրվեց ԱԳՆ շենքում: Դրոշը տեղադրելուց եւ շենքից դուրս գալուց հետո Իշխան Սաղաթելյանը հայտարարեց, որ Արցախը երբեք Ադրբեջանի կազմում չի լինելու եւ ԱԳՆ շենքում նստած յուրաքանչյուր դիվանագետ պետք է պայքարի Արցախի ինքնորոշման համար: «Արցախի դրոշները տեղադրելով գնալու ենք եւ որեւէ պաշտոնյա, ով Արցախի շահերը չի պաշտպանելու, պետք է ռադ լինի»,- հայտարարեց Իշխան Սաղաթելյանը՝ հավելելով, որ ժողովրդի կամքն անկասելի է, որ ժողովրդի առջեւ այլեւս որեւէ դուռ չի կարող փակվել, «որ դուռն ուզենք՝ քացով ենք բացելու»:
Կարդացեք նաև
«Կառավարության շենքի դուռն ենք բացելու»,- բղավեց ցուցարարներից մեկը: «Հերթով»,- արձագանքեց Իշխան Սաղաթելյանը: Երթը շարունակվեց Ամիրյան փողոցով՝ դեպի Ֆրանսիայի հրապարակ:
Նելլի ԳՐԻԳՈՐՅԱՆ
Լուսանկարը՝ «Սպուտնիկ Արմենիայի»
