Նիկոլ Փաշինյանն ասում է, թե Ալիեւը նոր պատերազմի համար լեգիտիմ հիմքեր է փնտրում, իսկ Հայաստանի ԱԽՔ Արմեն Գրիգորյանը դրանից հետո հայտարարում է, թե մինչեւ սեպտեմբեր Հայաստանը զորքը դուրս կբերի Արցախից: Այսինքն, իբր մենք Արցախում զորք ունենք:
Aravot.am-ը ՀՀ ԱԺ «Հայաստան» խմբակցության պատգամավոր, սահմանադրագետ Արամ Վարդեւանյանից հետաքրքրվեց, թե ԱԽՔ այդ վտանգավոր հայտարարությունը պատահակա՞ն էր, եւ դրանով նա Ալիեւին նրա որոնած հիմքերը չի՞ տալիս. «Ես հետեւյալը կասեմ: Այստեղ պատահականություն գտնելը շատ դժվար է: Այս իշխանությունները ամեն ինչ անում են, որպեսզի Հայաստանի եւ Արցախի շահերը չպաշտպանվեն: Անպատասխանատու հայտարարությունների շարանը երբեք նորություն չէ: Ես վերջերս նկատել եմ, որ նույնիսկ Շավարշ Քոչարյանը, ով, կարելի է ասել, Նիկոլ Փաշինյանի արցախյան պատերազմի ընթացքում եղել է արտաքին գործերի նախարարի տեղակալ, ուղիղ գնահատականը տվել է, որ իրենք իրենց հայտարարություններով միայն վնաս են տվել գործընթացին: Այդ վարքագիծը նորից շարունակվում է: Սա էլ է փաստ: Ինչի՞ են ուզում հասնել: Եկեք փաստը ֆիքսենք. ոչ Հայաստանի, ոչ էլ Արցախի շահերի պաշտպանությանը: Սա շատ վտանգավոր վարքագիծ է: Եվ այստեղ ուղղակի պետք է, որ մեր հայրենակիցների ստվար զանգվածների պահանջը տեղ հասնի: Եթե կա ժողովրդավարության նշույլ, օրվա իշխանությունները պետք է հեռանան հանուն Հայաստանի, հանուն Արցախի: Իրենք էլ գիտակցում չէ՞, որ չեն կարողանում այդ մարտահրավերներին դիմակայել: Իրենք էլ են դա ուղիղ ասում: Ասում են՝ խաղաղության օրակարգ, բայց չգիտեն կլինի՞ դա թե՞ չէ: Ասում են՝ չգիտենք Արցախը կկարողանա՞նք պաշտպանել, թե չէ, Հայաստանը կկարողանա՞նք պաշտպանել, թե չէ:
Խաղաղություն Երեւանի գնով: Ինչ-որ մեկը դրան պատրա՞ստ է, թե չէ: Հայաստանում այդպիսի մարդ չկա, որ դրան պատրաստ լինի»:
Արամ Վարդեւանյանը նաեւ հույս հայտնեց, որ անգամ իշխանական պատգամավորների մեջ կան այնպիսիք, որ դրան պատրաստ չեն:
Կարդացեք նաև
Աշոտ ՀԱԿՈԲՅԱՆ
