ԱԺ եվրոպական ինտեգրման հարցերի մշտական հանձնաժողովի նախագահ Արման Եղոյանն ապրիլի 4-ին ընդունել է Խորվաթիա-Հայաստան բարեկամական խմբի ղեկավար Դավոր Իվո Շտիրին եւ խմբի անդամ, Եվրոպական հարաբերությունների հանձնաժողովի նախագահ Դոմագոյ Հայդուկովիչին:
Արման Եղոյանը խորվաթ պատգամավորներին է ներկայացրել Ադրբեջանի կողմից Հայաստանի սուվերեն տարածքների օկուպացիայի, այդ երկրի բարձրագույն ղեկավարության կողմից շարունակական ռազմատենչ հռետորաբանության, Լաչինի միջանցքի ապօրինի շրջափակման եւ դրա հետեւանքով առաջացած հումանիտար ճգնաժամի վերաբերյալ մանրամասներ: Հանձնաժողովի նախագահը կարեւորել է եվրոպական երկրների աջակցությունը` զսպելու ավտորիտար երկրի հակաիրավական նկրտումները:
Քննարկվել են Հայաստան-Ադրբեջան խաղաղության պայմանագրի բանակցություններին առնչվող հարցեր: Առկա գործընթացները քննարկման առարկա են դարձել լայն տարածաշրջանում տեղի ունեցող զարգացումների համատեքստում:
Պատգամավորները խոսել են նաեւ Հայաստան-Եվրոպական միություն հարաբերությունների մասին, կարեւորել վերջինի աջակցությունը ժողովրդավարական Հայաստանին` ինստիտուտների կայացման եւ ինտեգրացիոն գործընթացների խորացման համար: Ուշադրության կենտրոնում է եղել եվրոպական հարաբերությունների հարցերով պատասխանատու հանձնաժողովների միջեւ հարաբերությունների զարգացումն ինչպես երկկողմ, այնպես էլ բազմակողմ մակարդակներում:
ՀՀ Ազգային ժողով
