Մարդու իրավունքների պաշտպանի աշխատակազմի համար հունվարի 12-ին և 13-ին կազմակերպվել է «Փաստահավաք առաքելության կարողությունների զարգացում» խորագրով աշխատաժողով:
Երկօրյա միջոցառման նպատակն էր զարգացնել Պաշտպանի աշխատակազմի՝ փաստահավաք աշխատանքներ իրականացնելու կարողությունները:
Մարդու իրավունքների պաշտպան Անահիտ Մանասյանը հանդես է եկել բացման խոսքով։
«Ցանկանում եմ հատուկ ընդգծել, որ այս աշխատաժողովը վերաբերում է շատ առանցքային հարցի, այն է` փաստահավաք աշխատանքների իրականացման ճիշտ մեթոդաբանությանը։ Ես՝ որպես Մարդու իրավունքների պաշտպան, չափազանց կարևորում եմ, որ մեր աշխատակազմն այս ոլորտում ունենա զարգացած կարողություններ և պատշաճ հմտություններ»,- ասել է Պաշտպան Անահիտ Մանասյանն իր բացման խոսքում:
Կարդացեք նաև
Աշխատաժողովին որպես փորձագետներ ներգրավվել են իրավապաշտպան Սիրանուշ Սահակյանը, սոցիոլոգներ Ավետիք Մեջլումյանն ու Գոհար Խաչատրյանը և իրավաբան Սոնա Ազատյանը, որոնք ներկայացրել են փաստահավաք աշխատանքներ կատարելու վերաբերյալ ուղեցույցը և պատասխանել մասնակիցների հարցերին:
Միջոցառման շրջանակներում հատուկ անդրադարձ է կատարվել Մարդու իրավունքների պաշտպանի ներկայացուցիչների կողմից փաստահավաք աշխատանքների մեթոդաբանությանը, առանձնահատկություններին ու գործնական խնդիրներին:
Միջոցառման ինտերակտիվ հատվածում Պաշտպանի աշխատակազմը կատարել է առաջադրանքներ, հնարավորություն է տրվել մշակել փաստահավաք գործունեության նպատակներին համահունչ հետազոտական գործիքներ և ներկայացնել արդյունքները:
Աշխատաժողովը կազմակերպվել է Եվրոպական Միության ֆինանսավորմամբ ՄԱԿ-ի կառույցների կողմից իրականացվող «Հաշվետու հաստատություններ և մարդու իրավունքների պաշտպանությունը Հայաստանում» ծրագրի շրջանակներում:
Մարդու իրավունքների պաշտպանի աշխատակազմի կարողությունների զարգացմանն ուղղված նման միջոցառումները կրում են շարունակական բնույթ։
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆԻ
ԱՇԽԱՏԱԿԱԶՄԻ ՀԱՆՐԱՅԻՆ ԿԱՊԵՐԻ ԲԱԺԻՆ
