-Այդ կալանավորումներն իրենց վախերն են: Որ ասում են՝ կալանավորենք, կվերջանա, կալանավորումով չի վերջանա: Պատմությունը, որ կարդում ենք, պատմությունը շարունակվում է ու կրկնվում է: Վստահ եմ, որ մեր հայ ազգը ոտքի է կանգնելու ու այս դավաճան իշխանություններին հեռացնելու է մեր երկրից,- այսօր քննչական կոմիտե մտնելուց առաջ լրագրողներին ասաց անձեռնմխելիությունից զրկված ԱԺ «Հայաստան» խմբակցության պատգամավոր Արթուր Սարգսյանը:
Հիշեցնենք, որ այսօր Ազգային ժողովում ՔՊ խմբակցությունը կողմ քվեարկեց պատգամավորի նկատմամբ քրեական հետապնդում հարուցելու համաձայնությանը:
Արդեն նախկին պատգամավորը հիշեց, որ 2020 թվականի նոյեմբերի 9-ից հետո պայքարում է, բոլոր փողոցային պայքարներին մասնակցել է, չի հոգնել, չի ընկճվել ու շարունակելու է այնքան պայքարել, մինչեւ հասնի իրենց նպատակին. «Այդ նպատակը անձնական չէ, ներկուսակցական չէ: Մեր հայրենիք ունենալու, եկեղեցի ունենալ-չունենալու խնդիրն է: Համոզված եմ, որ հայ ժողովուրդը ոտքի է կանգնելու ու այս իշխանություններին հեռացնելու է: Մենք այսօր գործ ունենք բռնապետության հետ, բայց դա չպետք է հիասթափեցնի որեւէ մեկին»:
Կարդացեք նաև
Նա անդրադարձավ նաեւ եկեղեցու դեմ շարունակվող արշավին եւ ասաց, որ Նիկոլ Փաշինյանին ճանաչելով՝ կարող է պնդել, որ ներխուժումը Էջմիածնի տարածք առաջիկայում լինելու է. «Թե ում են ձերբակալելու, ինչ են անելու, որ սրբազանին են կալանավորելու, չգիտեմ, բայց դա արվելու է»:
Արթուր Սարգսյանը երկրում ստեղծված իրավիճակը բնորոշեց Աստծո ու սատանայի պայքար:
Արփինե ՍԻՄՈՆՅԱՆ
