«Հայաստանում միշտ, բոլոր ժամանակներում վարչական ռեսուրսը չարաշահվել է, եւ այս իշխանությունները ոչնչով չեն տարբերվում նախորդ իշխանություններից վարչական ռեսուրսը կիրառելու իմաստով: Այնպես որ, ոչ մի անսպասելի բան չկա, ինչպես եւ կանխատեսում էինք, ինչպես եւ բարեխիղճ չէին, ինչպես բազմաթիվ փոփոխություններ պետք է արվեին եւ չեն արվել, նույն տրամաբանությամբ համակարգերը պահպանվել են, որպեսզի իրենք կարողանան վարչական ռեսուրսը չարաշահել ու անպատիժ մնալ:
Այլապես կունենայինք բազմաթիվ քրեական գործեր՝ հարուցված տարբեր մարդկանց, պաշտոնյաների՝ վարչական ռեսուրսի չարաշահման առիթով: Չնայած եթե այս հակասահմանադրական գործողությունների հետ կապված խնդիրներ չեն առաջացրել իրավապահ մարմինները, ուրեմն ինչի՞ մասին է խոսքը»,-ասաց «Բոլորին դեմ եմ» կուսակցության վարչապետի թեկնածուն՝ Նինա Կարապետյանցը՝ պատասխանելով Aravot.am-ի այն հարցին, արդյոք բոլորը հավասա՞ր են քարոզարշավ իրականացնում, իր կարծիքով վարչական ռեսուրս կիրառվո՞ւմ է, թե՞ ոչ:
Հետաքրքրվեցինք նաեւ իր այն ահազանգով, որ արդեն մտնում են ընտանիքներ, տարբեր ճնշումներ են իրականացնում ընտանիքի անդամների նկատմամբ, խնդրեցինք որոշ փակագծեր բացել: «Եթե հիմա փակագծեր բացեմ, վստահաբար շատ ավելի վատ վիճակում են հայտնվելու իմ ընտանիքի անդամները, հարազատները, հետեւաբար զուտ չվնասելու տրամաբանությունից ելնելով՝ կարծում եմ ճիշտ կլինի այս պահին չբարձրաձայնելը: Բայց որոշակի պահի ստիպված կլինեմ առանց փակագծերի խոսել»,-ասաց «Բոլորին դեմ եմ»-ի վարչապետի թեկնածուն:
Մեր հարցին՝ «Բոլորին դեմ եմ»-ը հիմա էլ բոլորին հրավիրում է Կարապի լիճ նախընտրական «ջուր ծեծոցիի», արդյոք նման ձեւաչափով հանդես գալը չի՞ անլրջացնում ընտրական պրոցեսները, ինչպես ոմանք են գնահատում, Նինա Կարապետյանցն այսպես արձագանքեց. «Մենք այդ իմաստով 2 խնդիր ենք լուծում. առաջինը ուշադրություն ենք գրավում, որովհետեւ չունենք անսահմանափակ քանակությամբ փող եւ ադմինիստրատիվ ռեսուրսներ, բոլորի համար հասանելի լրատվականներ, որպեսզի մեր տեղեկատվությունը տեղ հասցնենք:
Կարդացեք նաև
Մյուս կողմից՝ սա տասնամյակներով տեղի ունեցող իրադարձությունների ուղիղ իմաստով ցուցադրությունն է, նաեւ ցեխ շպրտելը: Մենք տասնամյակներով ունեցել ենք այդ ամենը, սակայն որեւէ մեկը չի ցանկացել ուղիղ իմաստով դրա մասին խոսել եւ ցույց տալ: Փոխարենը կյանքից, իրականությունից կտրված անհավանական ինչ-որ բաների մասին են խոսում շատերը ու հերթական անգամ մոլորության մեջ են գցում մարդկանց:
Մենք տասնամյակներով ունեցել ենք մշտական աբոնեմենտ ունեցող մարդկանց, որոնք բացառապես միայն ընտրություններին են մասնակցել: Այսինքն, որեւէ քաղաքական գործունեություն չեն իրականացրել, բայց ընտրությունից ընտրություն հայտնվել են…ծաղրելը, անլրջացնելը հենց դա է:
Ընտրական պրոցեսները ծաղրելն ու անլրջացնելը լինում է այն ժամանակ, երբ գալիս, ընտրողներին խոստումներ են տալիս ու լրիվ հակառակն են անում: Եթե մարդկանց թվում է, որ անպայման պետք է փողկապով լինես, ու կարեւոր չէ՝ ինչ կխոսես ու հետագայում ինչ կանես, դա լրջության մասին է խոսում, պիտի ասեմ, որ դա բացարձակ այդպես չէ: Անլրջացրել են բոլոր նրանք, որոնք թույլ են տվել, որ այսպիսի համակարգեր ունենանք, որտեղ մեկ անձը կգա ու կկառավարի, միանձնյա կազդի ժողովրդի ու պետության ճակատագրի վրա: Դա է անլրջացնելը՝ համակարգեր չստեղծելը, ներառյալ արդարադատության, անկախ ընտրություններ իրականացնելու համակարգեր չստեղծելը» ։
Նինա Կարապետյանցն ասաց, որ չափազանց կարեւորում է մարդկանց մասնակցությունն ընտրություններին. «Հաստատ կգտնեք նրանց, ում կուզենաք ձայն տալ, ընտրության գնալը սրբազան պարտքի նման մի բան պետք է համարի յուրաքանչյուրը»:
Գոհար ՀԱԿՈԲՅԱՆ
