«Եթե ես լինեի պատասխանատուն ԱԺ-ի առաջին նիստի, կապահովեի հստակ սահմանված կարգ․ Վեհափառ Հայրապետը կլիներ նիստերի դահլիճում՝ այնպես, ինչպես եղել է 2018-ին, 2019-ին, 2021-ին։ Հատուկ ընդգծում եմ 2019-ը և 2021-ը, քանի որ դա եղել է ձեր իշխանության ժամանակաշրջանը։ Չեմ հիշում, որ որևէ մեկը մտահոգություն ներկայացներ, թե Վեհափառ Հայրապետը ինչո՞ւ է ԱԺ նիստերի դահլիճում։ Բոլորդ հարգել եք Վեհափառ Հայրապետին։ Լավ, ի՞նչ է եղել, մենք Մայր Աթոռը պետք է վերածենք քաղաքական դիսկուրսի՞։ Ես լինեի պատասխանատուն, Վեհափառ Հայրապետը լինելու էր ԱԺ նիստերի դահլիճում, երդման հետ կապված էլ որևէ խնդիր չէր լինի»,- ՔՊ խմբակցության պատգամավոր Բաբկեն Թունյանի հարցին՝ եթե Դուք վարեիք ԱԺ առաջին նիստը, և պատգամավորները երդման ժամանակ ոտքի չկանգնեին, ինչպե՞ս կվարվեիք, այսպես պատասխանեց «Ուժեղ Հայաստան» խմբակցության կողմից ԱԺ նախագահի տեղակալի թեկնածու առաջադրված Արամ Վարդևանյանը։
ԱԺ-ն այս պահին քննարկում է նրա թեկնածությունը։
Նա հիշեցրեց նաև, որ իրենց խմբակցությունը ԱԺ առաջին նիստին է այդ խնդրի մասին խոսել, տեղից հարցնում էին՝ որտե՞ղ է Վեհափառ Հայրապետը։
Բաբկեն Թունյանը նաև նշեց՝ ասացիք, որ 2022-ի նոյեմբերին մանդատը վայր եք դրել փաստացի պայքարը ձախողելու համար և Ձեր տեղը քաղաքականության մեջ չէիք գտնում և հարցրեց՝ եթե հաշվի առնեք նախընտրական շրջանում օրակարգն ու խոսույթը, ապա դա էլ ձախողեցիք, որովհետև Ձեզ համար հաղթանակը մեկ ձև ուներ՝ Սամվել Կարապետյանի՝ վարչապետ լինելն էր, այսինքն՝ դա արդյոք չէր նշանակո՞ւմ, որ այս դեպքում էլ պիտի հրաժարվեիք։ Արամ Վարդևանյանն այսպես պատասխանեց․ «Մենք դիտարկում ենք հետևյալ կերպ։ Քաղաքական գնահատականն ընդգծեմ՝ մենք չենք պարտվել, դուք էլ չեք հաղթել։ Արդյունքում ձևավորվել է կառավարություն ձայների փոշիացման շնորհիվ»։
Կարդացեք նաև
Նորընտիր ԱԺ նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
