Մանկական մահացության յուրաքանչյուր դեպքի համար քրեական գործ է հարուցվում , անկախ նրանից՝ ծնողը բողոք ներկայացնո՞ւմ է, թե՞ ոչ։ Այս մասին նշեց ՀՀ Առողջապահության նախարար Դերենիկ Դումանյանը՝ ՀՀ առողջապահության նախարարությունում այսօր կայացած ասուլիսի ժամանակ։ Նախարարը նշեց նաև, որ մանկական մահացությունների թիվը 2013 թվականին նվազել է՝ գրանցվել է 9,9 պրոմիլ մահվան դեպք, որը 2 անգամ պակաս է, քան ԱՊՀ այլ երկրներինը, սակայն 2 անգամ ավելի է Եվրամիության երկրների ցուցանիշից։
Մայրական մահ եռամյակի կտրվածքով գրանցվել է 21,2 դեպք՝ 100 հազար կենդանի ծնված երեխաների հաշվարկով։
Ինչ վերաբերվում է դիաբետով հիվանդների բողոքներին Հնդկաստանից ներկրված դիազոլ դեղամիջոցի վերաբերյալ, ապա, ըստ նախարարի, հնարավոր է, որ հիվանդների վիճակը չի բարելավում այլ պատճառներով: Նա այդ դեղամիջոցի ազդեցությունը պարզելու համար հանդիպում է ունեցել ՀՀ գլխավոր էնդոկրինոլոգի, Երևանի գլխավոր էնդոկրինոլոգի և համապատասխան այլ մասնագետների հետ, և նրանք այդ դեղամիջոցը վտանգավոր չեն համարել։
Դ. Դումանյանը նշեց նաև, որ պետական պատվերով բուժվող յուրաքանչյուր հիվանդին պետք է տրամադրվի փաստաթուղթ, որտեղ կմատնանշվեն նրա իրավունքները։
Կարդացեք նաև
Բժիշկների աշխատավարձի վերաբերյալ Դ. Դումանյանը նշեց, որ պոլիկլինիկաներում աշխատող բժիշկների աշխատավարձը այս տարի պլանավորվում է բարձրացնել և հասցնել ամսեկան 178 հազար դրամի։
Ինչ վերաբերվում է ծխելուն, ապա նախարարի պնդմամբ՝ պետք է հասնել նրան, որ փակ տարածքներում արգելվի ծխելը։
Դ. Դումանյանը նշեց, որ Առողջապահության ազգային ինստիտուտը պայմանագիր է կնքել Ֆինլանդիայի առողջապահության ազգային ինստիտուտի հետ, ինչ, ըստ նրա, մեծ ձեռքբերում է ։
Դ. Դումանյանը նշեց նաև, որ 2014 թվականի գերակա խնդիրներից է կոռուպցիոն ռիսկերի նվազեցումը առողջապահական համակարգում։
Զառա ԱՍԿԱՐՅԱՆ
