Ազգային ժողովում այսօր ընթացող Ճանապարհային երթեւեկության կանոնների խախտումների համար վարչական պատասխանատվությունը, ճանապարհային անվտանգության ապահովման միջոցների կիրառումը եւ ավտոկայանատեղերի գործունեության կազմակերպումը թեմայով խորհրդարանական լսումների ժամանակ պատգամավորները լավ առիթ ունեցան խոսելու ժողովրդի անունից, ներկայացնելու, թե ինչպես է կեղեքվում ժողովուրդը՝ ճանապարհային երթեւեկության կանոնները խախտելու պատճառով: Նրանք առիթ ունեցան հիշել աղքատությունը, աղքատության շեմը եւ դրանից ներքեւ գտնվողներին, որոնք, սակայն, պարզվում է, մեքենա են վարում եւ ամսվա ընթացքում մի քանի հարյուր հազար դրամի խախտումներ անելու շռայլություն են իրենց թույլ տալիս:
Այդուհանդերձ, բոլոր պատգամավորները, որքան էլ խոսում էին կեղեքված ժողովրդի եւ անհայտ անձանց գրպանը մտնող գումարների մասին, հարկ էին համարում ասել, որ դեմ չեն երթեւեկության կարգավորմանը, տեսախցիկներին եւ արագաչափերին: Միակ մարդը, որ դա էլ էր վիճարկում՝ ՀԱԿ խմբակցության պատգամավոր Նիկոլ Փաշինյանն էր, ով հայտարարեց, որ արագաչափերը ընդհանրապես պետք է հանվեն, իսկ տեսախցիկներն էլ ոչ թե պետք է տուգանքները արձանագրեն, այլ բարդ իրավիճակների ժամանակ կանչեր գրանցեն:
Մելանյա ԲԱՐՍԵՂՅԱՆ
