Հայաստանում տարեկան 520 երեխա չի հաղթահարում 5 տարեկանի շեմը: Այսօր «Վորլդ Վիժն Հայաստան» կազմակերպությունը միջոցառում էր կազմակերպել՝ «Երեխաները կհաղթահարեն 5 տարեկանի շեմը» խորագրով՝ կանխարգելելու մանկական հաշմանդամության եւ մահվան դեպքերը Հայաստանում:
Հաշվի առնելով, որ պետբյուջեի միջոցները սուղ են՝ «Վորլդ Վիժնի» տնօրեն Ժիրայր Էդիլյանը դիմեց քաղաքական գործիչներին, ԱԺ պատգամավորներին՝ խնդրելով այնուամենայնիվ շարունակել ավելացնել մոր եւ մանկան առողջությանն ուղղված ֆինանսավորումը: «Վորլդ Վիժնի» կոչին միացան նաեւ երգչուհիներ Ինգա եւ Անուշ Արշակյանները, ինչպես նաեւ Մայր աթոռ սուրբ Էջմիածնի «Հայեցակարգային» գրասենյակի ղեկավար Բագրատ եպիսկոպոս Գալստանյանը:
Կարդացեք նաև
Առողջապահության նախարար Արմեն Մուրադյանի խոսքերով՝ «Ասելով մայր եւ մանուկ՝ պատկերացնում ես գորգուրանք, ջերմություն, գեղեցիկ ապագա: Շատ դժվար է արտահայտել մանկական մահացություն տերմինը: Մայրական եւ մանկական առողջությունը գտնվել է մշտապես ՀՀ նախագահի ուշադրության ներքո: Վերջին տարիներին գրանցված հաջողությունները պայմանավորված են հենց այդ հանգամանքով եւ ամենօրյա աշխատանքով, միջազգային բազմաթիվ կազմակերպությունների կողմից մշակված ծրագրերով: Այսօր մենք կարող ենք արձանագրել, որ մանկական մահացությունը եւ մայրական մահացությունը ԱՊՀ բոլոր երկրների հետ համեմատ գտնվում է զգալի նվազ թվերի վրա: Սակայն դա չի նշանակում, որ աշխատանքները կարելի է համարել բավարար: Պետք է հիշել, որ տարեկան մինչեւ 5 տարեկան շուրջ 6 մլն երեխա է մահանում եւ 350 հազար մայր: Այդ թվերը սարսափահար կարող են անել ոչ միայն յուրաքանչյուր հայ մարդու, այլեւ մարդու, ով զուրկ չի ծնողական զգացմունքներից»:
Նախարարը նշեց, որ այս օրերին ԱՀԿ-ն քննարկելու է նորածինների կենսունակությանն ուղղված ծրագրերի իրականացումը:
Միջոցառման ժամանակ նաեւ պարգեւատրվեցին «Երեխաները կհաղթահարեն 5 տարեկանի շեմը» լրագրողական նյութերի հաղթողները: Առաջին մրցանակի արժանացավ «Առավոտ» օրաթերթի լրագրող Նելլի Բաբայանը՝ «Եթե շուտ լիներ այդ սկրինինգը, տղաս հիմա առողջ կլիներ» նյութի համար:
Մրցանակներ ստացան նաեւ «Արմենիա» հեռուստաընկերության լրագրող Աննա Բալյանը եւ «Հանրային հեռուստատեսության «Առավոտ լուսո» ծրագրի լրագրող Նարինե Մարդումյանը:
Հռիփսիմե ՋԵԲԵՋՅԱՆ
